Ushtria amerikane njoftoi se vrau gjashtë persona gjatë një sulmi ndaj një anijeje të dyshuar për trafik droge në Oqeanin Paqësor Lindor. Sipas Komandës Jugore të Shteteve të Bashkuara, operacioni ishte pjesë e fushatës së administratës së Donald Trump kundër trafikantëve të drogës, të cilët ai i ka quajtur “narkoterroristë”.
Ushtria publikoi një video në rrjetin X (Twitter), ku shihet një anije e vogël që shpërthen në det gjatë sulmit.
Ky operacion e çon në të paktën 157 numrin e personave të vrarë që nga fillimi i shtatorit, kur SHBA nisi sulme të shumta ndaj anijeve të dyshuara për trafik droge në Paqësorin Lindor dhe në Detin e Karaibeve.
Autoritetet amerikane thonë se këto operacione synojnë rrugët kryesore të kontrabandës së drogës, megjithëse në disa raste nuk janë publikuar prova konkrete që anijet transportonin drogë.
Presidenti Donald Trump ka deklaruar se Shtetet e Bashkuara janë në një “konflikt të armatosur” me kartelet e drogës në Amerikën Latine dhe ka kërkuar që vendet e rajonit të bashkohen në veprime ushtarake kundër tyre. Në këtë kuadër, SHBA dhe Ekuadori zhvilluan javën e kaluar operacione të përbashkëta kundër grupeve të krimit të organizuar.
Megjithatë, këto sulme kanë nxitur kritika nga ekspertë ligjorë dhe politikanë, të cilët vënë në dyshim ligjshmërinë dhe efektivitetin e tyre. Kritikat janë shtuar edhe pas raportimeve se në një rast ushtria amerikane goditi sërish një anije për të vrarë të mbijetuarit e një sulmi të parë.
Ndërkohë, analistët theksojnë se droga sintetike si Fentanyl, e cila shkakton shumë nga mbidozat fatale në SHBA, zakonisht trafikohet përmes rrugëve tokësore nga Meksika, ku prodhohet me kimikate të importuara nga Kina dhe India.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
