Zona të mëdha të qendrës historike të Dresdenit janë evakuuar për t’u lejuar ekspertëve të çaktivizimit të bombave të çaktivizojnë një bombë të pashpërthyer të Luftës së Dytë Botërore. Rreth 17.000 personave iu kërkua të largoheshin nga shtëpitë e tyre në qytetin lindor të Gjermanisë, njoftuan autoritetet.
Zemra e qytetit mbeti e shkretë, me një spital, dy azile pleqsh, nëntë shkolla dhe një studio televizive të evakuuara.
Bomba e prodhuar në Britani e gjetur në Dresden, me peshë 250 kilogramë, u zbulua gjatë punimeve të pastrimit në një urë të shembur.
Zona e prekur përfshin Frauenkirche-n e famshme, kishën e rindërtuar tullë pas tullës pasi u shkatërrua gjatë luftës, si dhe disa hotele.
Ura Carola, një nga kalimet kryesore të lumit Elba në Dresden, u shemb pjesërisht në mes të natës në shtator 2024. E gjithë struktura është planifikuar të shembet deri në tetor.
Gati 80 vjet pas përfundimit të luftës, Gjermania është ende e mbushur me municione të pashpërthyera të cilat shpesh zbulohen gjatë punimeve të ndërtimit.
Mbi 20.000 persona u evakuuan nga qendra e Këlnit në qershor pas zbulimit të tre bombave të pashpërthyera nga Lufta e Dytë Botërore, operacioni më i madh i tillë në qytet që nga fundi i luftës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
