Banka Qendrore Europiane (BQE) vendosi të rrisë normat bazë të interesit me 0.25 pikë përqindjeje, pas gati një viti pa ndryshime, në përpjekje për të frenuar inflacionin e shkaktuar nga rritja e çmimeve të energjisë si pasojë e konfliktit në Lindjen e Mesme.
Në njoftimin zyrtar, BQE theksoi se vendimi synon të përballojë pasiguritë ekonomike të krijuara nga lufta dhe ndikimin e saj në tregjet energjetike.
Pas vendimit të ri, norma e depozitave, e cila konsiderohet treguesi kryesor i politikës monetare të bankës, është rritur në 2.25%.
Ndërkohë, norma e rifinancimit është vendosur në 2.40%, ndërsa norma e kredisë margjinale ka arritur në 2.65%.
Paralelisht me rritjen e normave të interesit, BQE ka rishikuar edhe parashikimet ekonomike për vitet e ardhshme, duke paralajmëruar inflacion më të lartë dhe rritje ekonomike më të dobët në zonën euro.
Sipas projeksioneve të reja, inflacioni në vitin 2026 pritet të arrijë në 3%, krahasuar me parashikimin e mëparshëm prej 2.6%.
Edhe për vitin 2027, inflacioni parashikohet të mbetet mbi objektivin e bankës, në nivelin 2.3%. Nga ana tjetër, ekonomia e zonës euro pritet të rritet me 0.8% gjatë vitit 2026, më pak se parashikimi i mëparshëm prej 0.9%.
Për vitin 2027, rritja ekonomike pritet të jetë 1.2%, nga 1.3% që ishte vlerësuar më herët.
BQE argumenton se rritja e vazhdueshme e çmimeve të energjisë, e lidhur me konfliktin në Lindjen e Mesme, po ushtron presion të fortë mbi inflacionin dhe po ngadalëson aktivitetin ekonomik në vendet e eurozonës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
