Japonia shënoi rënien më të madhe të popullsisë në historinë e vendit në vitin 2024

Popullsia e Japonisë ra me një numër rekord, prej më shumë se 900.000 personash në vitin 2024, sipas të dhënave zyrtare japoneze të publikuara të mërkurën, më 6 gusht, pavarësisht përpjekjeve të qeverisë për të rritur shkallën e lindjeve. 

Vitin e kaluar, numri i japonezëve ra me 908.574 persona, ose 0.75 për qind, duke arritur në 120.65 milionë.

Disa muaj më parë, Kryeministri Shigeru Ishiba e quajti situatën një “emergjencë të heshtur”, duke u zotuar të prezantojë masa miqësore për familjen, si orare pune më fleksibile dhe kujdes falas për fëmijët, për të tentuar që të përmbysë trendin.

Rënia e regjistruar në vitin 2024, rënia e 16-të radhazi, është më e madhja që nga fillimi i të dhënave në vitin 1968, shpjegoi Ministria e Punëve të Brendshme të mërkurën.

Nga ana tjetër, numri i banorëve të huaj arriti nivelin e tij më të lartë që nga fillimi i të dhënave në vitin 2013, me 3.67 milionë të huaj që nga 1 janari 2025, ose gati 3% e popullsisë së përgjithshme të Japonisë. Kjo ishte 124.330.690 persona, 0.44% më pak se një vit më parë.

Sipas Bankës Botërore, Japonia ka popullsinë e dytë më të vjetër në botë me një moshë mesatare prej 49.9 vjeç, pas Monakos 56.9 vjeç. Sipas grupmoshës, japonezët e moshës 65 vjeç e lart përfaqësojnë 29.58% të popullsisë, ndërsa ata të moshës 15-64 vjeç përbëjnë 59.04%, të dyja duke treguar rritje të lehta krahasuar me vitin 2023.

Sipas të dhënave të publikuara në qershor nga Ministria e Shëndetësisë, numri i lindjeve në Japoni vitin e kaluar ra nën 700.000 për herë të parë. Arkipelagu mirëpriti 686.061 të porsalindur në vitin 2024, 41.227 më pak se në vitin 2023. Kjo ishte shifra më e ulët që nga fillimi i mbajtjes së të dhënave në vitin 1899. 

Shkalla e fertilitetit, numri mesatar i fëmijëve që një grua pritet të ketë gjatë jetës së saj, ra gjithashtu në një nivel rekord prej 1.15.