Presidenti i SHBA-së, Donald Trump, ka sulmuar sërish kancelarin gjerman Friedrich Merz, duke i kërkuar të “rregullojë vendin e tij të dështuar” dhe të fokusohet më shumë në përfundimin e luftës mes Rusisë dhe Ukrainës.
Në një postim në rrjetet sociale, Trump kritikoi Merz për mungesë efikasiteti në trajtimin e konfliktit në Ukrainë, duke shtuar se kancelari duhet të përqendrohet te problemet e brendshme të Gjermanisë, si emigracioni dhe energjia, në vend që të “ndërhyjë” në çështjet që lidhen me Iranin dhe programin e tij bërthamor.
Deklaratat e Trump vijnë vetëm një ditë pasi ai sugjeroi se prania ushtarake amerikane në Gjermani është në shqyrtim, duke përmendur një “reduktim të mundshëm” të trupave. Aktualisht, mes 36 mijë dhe 39 mijë ushtarë amerikanë janë të vendosur në Gjermani, kryesisht në bazat ushtarake në Stuttgart dhe Ramstein.
Reagimi i Trump duket të jetë nxitur nga deklaratat e forta të Merz më herët gjatë javës, ku kancelari kishte akuzuar SHBA-në se po “poshtërohej” nga Irani dhe kishte kritikuar mungesën e një strategjie daljeje nga konflikti.
Të enjten, gjatë një vizite në një bazë ushtarake në Münster, Merz adoptoi një ton më pajtues, duke theksuar rëndësinë e marrëdhënieve me NATO-n dhe SHBA-në, si dhe duke kritikuar Iranin për refuzimin e pjesëmarrjes në negociatat e paqes.
Zyrtarët gjermanë u përpoqën të minimizojnë tensionet, duke theksuar se kërcënimet për tërheqjen e trupave amerikane nuk janë të reja. Ministri i Jashtëm gjerman, Johann Wadephul, deklaroi se edhe presidentë të mëparshëm amerikanë si Joe Biden, Barack Obama dhe Bill Clinton kanë bërë deklarata të ngjashme për ripozicionimin e trupave.
Ai shtoi se Gjermania është e përgatitur për çdo ndryshim dhe se ushtria gjermane po merr masa për t’u përshtatur me zhvillimet e reja, duke theksuar nevojën për të marrë më shumë përgjegjësi në sigurinë rajonale.
Megjithatë, ekspertët theksojnë rëndësinë strategjike të bazës ajrore në Ramstein, duke e konsideruar atë thelbësore për operacionet amerikane dhe bashkëpunimin transatlantik.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
