Banka Qendrore e Kubës ka njoftuar se kartat ndërkombëtare Visa dhe Mastercard do të ndalojnë së funksionuari në vend duke filluar nga 6 qershori 2026. Vendimi lidhet me sanksionet e reja amerikane dhe presionin mbi institucionet financiare që bashkëpunojnë me subjektet kubane.
Sipas autoriteteve kubane, banka e huaj që ndërmjetësonte transaksionet ndërkombëtare me kompaninë financiare kubane FINCIMEX ka vendosur të ndërpresë bashkëpunimin për të shmangur sanksionet e mundshme nga Shtetet e Bashkuara.
Si pasojë, rrjeti i pagesave Visa dhe Mastercard nuk do të jetë më i disponueshëm në ishull.
Pezullimi do të prekë si qytetarët kubanë ashtu edhe turistët që përdorin karta Visa dhe Mastercard për blerje, rezervime dhe tërheqje parash.
Vizitorët e huaj pritet të mbështeten më shumë tek paratë cash ose tek sistemet alternative të pagesave që vazhdojnë të operojnë në Kubë.
Ekspertët paralajmërojnë se ky zhvillim mund të vështirësojë më tej qarkullimin financiar në një ekonomi që tashmë përballet me mungesa valutore dhe kufizime në tregtinë ndërkombëtare.
Largimi i Visa dhe Mastercard vjen në një moment kur disa kompani ndërkombëtare kanë reduktuar ose ndërprerë aktivitetin e tyre në Kubë për shkak të tensioneve politike dhe ekonomike.
Masat e reja amerikane synojnë të rrisin presionin ekonomik ndaj qeverisë kubane duke kufizuar bashkëpunimin me entitete të lidhura me shtetin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
