Bashkimi Evropian ka arritur një marrëveshje historike për t’i dhënë fund varësisë nga energjia ruse, ndërsa Komisioneri i Energjisë, Dan Jorgensen, deklaroi se “Evropa nuk do të kthehet më kurrë te gazi rus”, pavarësisht zhvillimeve të ardhshme në luftën Rusi–Ukrainë.
Në një intervistë për Euronews, Jorgensen konfirmoi se BE-ja është gjithashtu duke përgatitur një ligj të ri për ndalimin e naftës ruse, i cili pritet të prezantohet së shpejti.
Marrëveshja e re: ndalim total deri në fund të 2027
Sipas vendimit të ri:
LNG dhe gazi i tubacioneve nga Rusia do të ndalohen plotësisht deri në fund të vitit 2027.
Kontratat afatshkurtra të lidhura para 17 qershorit do të ndërpriten më:
25 prill 2026 për LNG
17 qershor 2026 për gazin e tubacioneve
Kontratat afatgjata të gazit të tubacioneve do të pezullohen më 30 shtator 2027, me mundësi shtyrjeje deri më 1 nëntor 2027, nëse rezervat e gazit janë të ulëta.
Komisioneri theksoi se zbatimi do të jetë gradual për të shmangur tronditje në treg.
Marrëveshja ka hasur kundërshtim nga Hungaria, e cila ka paralajmëruar sfida ligjore ndaj propozimit të Komisionit.
“Nuk i kuptoj këto vende. Duhet të qëndrojmë të bashkuar kundër Putinit,” u shpreh Jørgensen, duke siguruar se BE-ja është e gatshme të ndihmojë shtetet që mund të përballen me vështirësi të furnizimit.
Jorgensen kujtoi krizën energjetike të vitit 2022, kur çmimet u rritën në nivele rekord pas pushtimit të Ukrainës nga Rusia.
“Nuk duhet të përsërisim gabimin e varësisë nga Moska,” tha ai, duke e cilësuar këtë vendim si një pikë kthese të pakthyeshme për të ardhmen energjetike të BE-së.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
