Qeveria gjermane ka mbështetur propozimet e një komisioni ekspertësh që rekomandon rritjen graduale të moshës ligjore të daljes në pension përtej 67 vjeç, duke e lidhur atë me rritjen e jetëgjatësisë së popullsisë.
Masa vjen në një kohë kur Gjermania po përballet me sfida të mëdha demografike dhe plakjen e popullsisë.
Sipas raportit të komisionit, mosha e pensionit, e cila aktualisht është 66 vjeç dhe pritet të arrijë në 67 vjeç deri në vitin 2031, duhet të përshtatet më pas me zhvillimet e jetëgjatësisë.
Bazuar në parashikimet aktuale demografike, mosha e pensionit mund të rritet me rreth gjashtë muaj gjatë periudhës 2031-2041, ndërsa në dekadat e ardhshme pritet të ketë shtyrje të mëtejshme.
Komisioni ka propozuar gjithashtu heqjen e mundësisë për pension të parakohshëm pa penalizime pas 45 viteve kontributesh, skemë që aktualisht lejon daljen në pension që në moshën 64-vjeçare.
Ekspertët sugjerojnë një reformë më të gjerë të sistemit të pensioneve, duke rekomanduar që ai të mos mbështetet vetëm te vitet e kontributeve.
Në të njëjtën kohë, ata kërkojnë lehtësimin e procedurave për personat që, pas vlerësimeve mjekësore, nuk janë më në gjendje të vazhdojnë punën dhe kanë nevojë për akses më të thjeshtë në pension.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
