Mbetjet e D'Artagnan mund të jenë gjetur në Maastricht

Mbetjet e Charles de Batz de Castelmore - musketieri i katërt d'Artagnan - mund të jenë gjetur më në fund në një kishë pranë Maastrichtit, duke vërtetuar teorinë e historianes franceze Odile Bordaz.

Disa media holandeze, përfshirë DutchNews, e bënë të ditur lajmin. 

Studiuesja hodhi hipotezën në vitin 2008 se d'Artagnan mund të jetë varrosur "me nxitim, siç ishte zakon në kohë lufte", në kishën ngjitur me kampin ushtarak francez në Wolder. D'Artagnan, udhëheqësi i korpusit elitar të zotërinjve të Mbretit Louis XIV, vdiq në betejë në vitin 1673 gjatë rrethimit francez të Maastrichtit, me shumë mundësi nga një plagë e shkaktuar nga një plumb muskete. Varrimi nuk u regjistrua në arkivat e kishës dhe nuk është gjetur kurrë asnjë provë tjetër. Por në shkurt, dyshemeja e kishës u shemb, duke zbuluar një skelet me mbetjet e një plumbi muskete të ngulura në gjoks dhe një monedhë franceze.

"Trupi u gjet aty ku dikur qëndronte altari", tha dhjaku Jos Valke për L1Nieuws.

"Vetëm anëtarë të familjes mbretërore ose individë të tjerë të rangut të lartë u varrosën atje", shtoi ai. ADN-ja e marrë nga dhëmbët e skeletit aktualisht po krahasohet me atë të një pasardhësi të një anëtari të familjes De Batz. D'Artagnan ishte krahu i djathtë i Louis XIV për spiunazh, misione sekrete dhe mbrojtje personale. Kur lajmi për vdekjen e tij arriti te mbreti, ai i tha gruas së tij Maria Teresa: "E kam humbur d'Artagnanin, të cilit i besoja në mënyrë implicite dhe i cili ishte i aftë për çdo gjë".

Një figurë historike pak e njohur, ai u bë i famshëm në mbarë botën vetëm pas botimit të veprës së Alexandre Dumas, 'Tre Musketjerët', në 1844. Libri - i cili ka pak të bëjë me realitetin - e paraqet D'Artagnanin si musketierin e katërt, së bashku me Aramis, Porthos dhe Athos, dhe e ka bërë atë vërtet të pavdekshëm: në Maastricht, për shembull, ekziston një statujë e tij që e paraqet atë si një simbol të "guximit dhe miqësisë".