Orban: BE të ndalojë mbështetjenpër Ukrainën dhe të shpenzojë paratë të mbështetur ekonominë e vet

Bashkimi Evropian duhet të ndalojë mbështetjen financiare për Ukrainën dhe të shpenzojë paratë e veta për të mbështetur ekonominë e vet.

Kështu deklaroi kryeministri hungarez Viktor Orban të enjten  në një samit të 27 vendeve anëtare të BE-së të fokusuar në konkurrueshmëri. 

"Mos ia dërgoni paratë tuaja dikujt tjetër nëse keni nevojë për konkurrueshmërinë tuaj, dhe për këtë arsye mos ia dërgoni paratë tuaja Ukrainës!", deklaroi udhëheqësi, kritiku kryesor i BE-së për mbështetjen e Kievit.

Deri në fund të vitit 2025, BE-ja kishte mobilizuar një total prej afërsisht 177 miliardë eurosh ndihmë për Ukrainën, në formën e mbështetjes ushtarake, ndihmës buxhetore dhe ndihmës për refugjatët, sipas një raporti të publikuar nga Parlamenti Evropian. 

Kjo shumë do të plotësohet nga një kredi prej 90 miliardë eurosh nga BE-ja për Ukrainën, e cila synon të ndihmojë Kievin të mbulojë nevojat e saj financiare për vitet 2026 dhe 2027.