Katër muaj pas themelimit të tij, fondi zyrtar financiar i krijuar nga Banka Botërore për organizatën “Bordi i Paqes” nga Presidenti amerikan Donald Trump nuk ka marrë asnjë kontribut nga donatorët, raportoi Financial Times, duke cituar katër persona të njohur me çështjen.
Fondi i administruar nga Banka Botërore dhe i mbështetur nga Kombet e Bashkuara duhej të shërbente si mekanizëm kryesor për financimin e rindërtimit të Gazës pas luftës.
“Zero dollarë janë depozituar”, tha një nga burimet për FT.
“Bordi i Paqes” u krijua në janar 2026 me synimin për të mbikëqyrur rindërtimin e Gazës dhe për të koordinuar ndihmën ndërkombëtare.
Trump e kishte përshkruar organizatën si një nga institucionet më të rëndësishme ndërkombëtare të krijuara ndonjëherë. Shtetet anëtare premtuan rreth 7 miliardë dollarë për paketën e ndihmës për Gazën, ndërsa vetë SHBA premtoi edhe 10 miliardë dollarë shtesë.
Megjithatë, në vend që fondet të kalonin përmes mekanizmit të Bankës Botërore, disa donatorë kanë transferuar para direkt në një llogari të veçantë të JPMorgan Chase.
Kjo llogari nuk i nënshtrohet të njëjtave standarde të transparencës dhe raportimit që aplikohen për fondin zyrtar të Bankës Botërore.
Deri tani nuk është dhënë asnjë kontratë për rindërtim dhe nuk ka nisur asnjë projekt konkret në terren. Burime të përfshira në planifikimin pasluftës thanë se asnjë dollar amerikan nuk është përdorur ende për rindërtimin e Gazës.
Biznesmeni palestinezo-amerikan Bishara Bahbah, i cili ka ndihmuar në negociatat me Hamasin në emër të administratës Trump, deklaroi se komiteti teknokratik palestinez i krijuar nga organizata nuk ka mundur të fillojë punën në Gaza për shkak të mungesës së financimit.
“Ata e dinë se nëse shkojnë në Gaza, njerëzit do t’i rrethojnë duke kërkuar ndihmë, por ata nuk kanë mjete dhe as burime. Situata është vërtet e zymtë”, tha Bahbah për FT.
Disa fonde janë premtuar në mënyrë të drejtpërdrejtë nga vende si Emiratet e Bashkuara Arabe dhe Maroku. Emiratet kanë kontribuar me rreth 20 milionë dollarë për administrimin e strukturës dhe pagat e komitetit palestinez, ndërsa Maroku ka dhënë rreth 3 milionë dollarë.
Një program prej 100 milionë dollarësh për trajnimin e forcave policore në Gaza mbetet i ngrirë dhe ende nuk ka nisur.
Ndërkohë, organizata përballet edhe me paqartësi ligjore në SHBA. Disa ligjvënës amerikanë kanë ngritur pikëpyetje nëse “Bordi i Paqes” ka status të qartë juridik për të marrë fonde federale amerikane.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
