Një kryqëzor raketash amerikan, USS Lake Erie, hyri në Kanalin e Panamasë të premten duke u drejtuar për në Karaibe, ku vendosja ushtarake e kërkuar nga Uashingtoni po provokon zemërimin e Venezuelës.
Anija luftarake kaloi nëpër njërën nga pjesët e kanalit nga Paqësori rreth orës 21:30 të mbrëmjes sipas orës lokale dhe u drejtua në lindje drejt Atlantikut, vunë në dukje gazetarët në vendngjarje, për një kalim tetë-orësh që mbuloi 80 kilometra.
Anija, me numrin 70 të pikturuar me shkronja të bardha në trupin e saj, ishte ankoruar për dy ditët e fundit në Portin e Rodmanit, në hyrjen e kanalit në Paqësor.
Shtetet e Bashkuara kanë njoftuar dërgimin e disa anijeve luftarake në Karaibe në përpjekje për të luftuar trafikun ndërkombëtar të drogës. Javën e kaluar, Uashingtoni njoftoi vendosjen e tre shkatërruesve me raketa të telekomanduara të klasit Arleigh Burke në brigjet e Venezuelës.
Të martën, një zyrtar amerikan që kërkoi të mbetej anonim tha se Donald Trump kishte vendosur të dërgonte edhe një kryqëzor me raketa të telekomanduara, USS Lake Erie, dhe nëndetësen sulmuese me energji bërthamore USS Newport.
Në përgjigje, Venezuela njoftoi se po dërgonte anije të Marinës dhe dronë për të patrulluar ujërat e saj territoriale.
Uashingtoni dhe Karakasi kanë qenë në konflikt për vite me radhë dhe presidenti i ri amerikan po rrit presionin mbi homologun e tij venezuelian Nicolas Maduro, rizgjedhja e të cilit në korrik 2024 nuk u njoh nga SHBA, nën presidencën e Joe Biden deri në janar.
Administrata Trump dyfishoi shpërblimin e ofruar në fillim të gushtit në 50 milionë dollarë për çdo provë që çon në arrestimin e Nicolas Maduro, i akuzuar për drejtimin e një “karteli narko-terrorist”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
