Largohet Will Cathcart nga WhatsApp, Meta emëron pasardhës themeluesin e startup-it indian Cred

Pas gati shtatë vitesh në krye të WhatsApp, Will Cathcart ka njoftuar largimin nga drejtimi i platformës së mesazheve, duke i hapur rrugë një prej ndryshimeve më të rëndësishme në historinë e aplikacionit, njofton BBC. 

Gjatë mandatit të tij, WhatsApp u zgjerua në mbi 3 miliardë përdorues në mbarë botën, duke shtuar funksione të reja dhe duke forcuar fokusin te privatësia dhe komunikimi i sigurt. 

Cathcart deklaroi se platforma ndodhet në pozicionin më të fortë të saj dhe se ky ishte momenti i duhur për t’u larguar nga drejtimi i saj. Ai do të vazhdojë të mbajë një rol të rëndësishëm brenda Meta-s.

Pasardhësi i tij do të jetë Kunal Shah, themeluesi i kompanisë indiane të teknologjisë financiare Cred. Lajmi u konfirmua nga drejtori ekzekutiv i Meta-s, Mark Zuckerberg, i cili e vlerësoi Shah si një prej sipërmarrësve më të suksesshëm të teknologjisë në Indi dhe personin e duhur për të drejtuar aplikacionin më të madh të mesazheve në botë.

Cred, me seli në Bengaluru, është një platformë financiare e krijuar në vitin 2018 që ofron shërbime pagesash dhe shpërblime për përdoruesit. 

Paralelisht me emërimin e Shah në krye të WhatsApp, Meta ka investuar rreth 900 milionë dollarë në Cred, duke siguruar një pjesëmarrje prej rreth 20% në kompani.

Emërimi i Shah vjen në një moment kur Meta synon të zgjerojë më tej aktivitetin e WhatsApp përtej mesazheve tradicionale, duke u fokusuar te pagesat digjitale, komunikimi i bizneseve, inteligjenca artificiale dhe shërbimet e reja të monetizimit. 

Sipas të dhënave të “World Population Review”, “WhatsApp” numëron rreth 853 milionë përdorues në Indi.

Platforma, pjesë e familjes së aplikacioneve të “Meta-s” së bashku me “Facebook”, “Instagram” dhe “Messenger”, është një nga shtyllat kryesore të strategjisë së kompanisë, për rritjen e të ardhurave përmes reklamave, abonimeve me pagesë dhe mjeteve të inteligjencës artificiale.