Presidenti i Shteteve të Bashkuara, Donald Trump, ka deklaruar se kryeministri izraelit, Benjamin Netanyahu, “nuk do të ketë zgjidhje tjetër” përveçse të pranojë çdo marrëveshje që Uashingtoni mund të arrijë me Iranin.
Në një intervistë për Financial Times, Trump theksoi se vendimet për negociatat me Teheranin do të merren nga SHBA-ja dhe jo nga Izraeli.
“Ai nuk do të ketë zgjidhje tjetër. Unë i marr të gjitha vendimet. Netanyahu nuk i merr të gjitha vendimet”, tha Trump.
Komentet e presidentit amerikan erdhën menjëherë pas sulmeve me raketa balistike të Iranit ndaj Izraelit, të cilat u kryen si përgjigje ndaj një sulmi izraelit kundër objektivave të Hezbollahut në Bejrut.
Trump kishte deklaruar më herët se do t’i kërkonte Netanyahut të mos kundërpërgjigjej ndaj Iranit, në mënyrë që të mos rrezikoheshin përpjekjet diplomatike mes Uashingtonit dhe Teheranit.
Presidenti amerikan tha se sulmet iraniane nuk do të ndikojnë në negociatat për një marrëveshje me Iranin.
“Mendoj se marrëveshja po vazhdon. Do të shohim çfarë do të ndodhë. Marrëveshja do të ketë sukses ose jo mbi bazën e meritave të saj, por këto sulme nuk do të kenë ndikim mbi të”, u shpreh ai.
Megjithatë, Trump nuk dha detaje nëse një marrëveshje është afër finalizimit.
Ai kishte deklaruar më herët për Fox News se palët ishin shumë pranë një marrëveshjeje para se të ndodhnin sulmet e fundit me raketa.
Trump përsëriti gjithashtu se nëse diplomacia dështon, SHBA-ja do të shqyrtojë opsione të tjera, përfshirë masa ushtarake ose vazhdimin e bllokadës detare ndaj Iranit.
“Mosarritja e një marrëveshjeje mund të çojë ose në veprime të mëtejshme ushtarake, ose në vazhdimin e bllokadës, e cila ka qenë ndoshta më e fuqishme se çdo sulm i kryer ndonjëherë ndaj Iranit”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
