Tregjet globale janë zgjuar nën hijen e një tjetër përshkallëzimi dramatik në Lindjen e Mesme, pasi çmimi i naftës Brent u rikthye mbi pragun e 100 dollarëve për fuçi, ndërsa armëpushimi mes SHBA-së dhe Iranit po lëkundet vetëm pak ditë pas deklaratave optimiste për paqe.
Gjatë natës, Uashingtoni dhe Teherani shkëmbyen zjarr në dhe rreth ngushticës strategjike të Hormuzit, duke ndezur frikën për një krizë të re energjetike globale. Irani akuzoi SHBA-të për shkelje të armëpushimit dhe sulme ndaj dy anijeve iraniane, si edhe bombardime në zona civile.
Nga ana tjetër, amerikanët deklaruan se goditjet erdhën si kundërpërgjigje ndaj sulmeve “të paprovokuara” ndaj tre anijeve luftarake amerikane.
Në mes të tensioneve, tregjet reaguan menjëherë: nafta Brent u ngjit në 101 dollarë për fuçi, duke rikthyer ankthin për furnizimin global me energji dhe një valë të re shtrenjtimi në ekonomi.
Ironikisht, vetëm dy ditë më parë tregjet kishin marrë frymë pas sinjaleve për paqe. Por tani, optimizmi është zbehur nga deklaratat kontradiktore dhe shkëmbimet ushtarake.
Presidenti Donald Trump tentoi të ulë tensionet, duke e quajtur sulmin iranian ndaj shkatërruesve amerikanë “vetëm një trokitje dashurie”, ndërsa këmbënguli se armëpushimi “mbetet ende në fuqi”.
Megjithatë, investitorët nuk duken plotësisht të bindur. Çdo zhvillim i ri në Hormuz, arteria kryesore e naftës botërore mund të ndezë sërish tregjet dhe të shtyjë çmimet edhe më lart.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
