Të paktën 11 persona kanë humbur jetën dhe mbi 330 të tjerë janë plagosur pasi tornadot goditën provincën qendrore Hubei në Kinë, ndërsa një person rezulton ende i zhdukur, raportojnë mediat shtetërore.
Sipas agjencisë shtetërore të lajmeve Xinhua, stuhitë e fuqishme që përfshinë disa zona të Hubeit mbrëmjen e së hënës prekën rreth 14.600 banorë. Përveç viktimave dhe të plagosurve, më shumë se 20 banesa u shembën, ndërsa mbi 4.800 të tjera pësuan dëmtime.
Një tornado e rrallë e kategorisë EF2 goditi qytetin Huanggang, duke shkaktuar dëme të konsiderueshme në ndërtesa dhe infrastrukturë. Një kompani logjistike dhe një kompleks magazinash u goditën rëndë, ndërsa erërat e fuqishme ngritën dhe zhvendosën disa kamionë deri në 30 metra larg.
Pamjet e publikuara në rrjetet sociale tregojnë momentet e frikshme kur erërat e forta thyen dyert prej xhami të një ndërtese, ndërsa njerëzit përpiqeshin të gjenin strehim.
Meteorologët theksojnë se tornadot janë të pazakonta në provincën Hubei, pasi zakonisht shfaqen në provincat jugore dhe bregdetare si Guangdong dhe Jiangsu. Sipas ekspertëve, fenomeni u favorizua nga një kombinim faktorësh atmosferikë, përfshirë mbetjet e stuhisë tropikale Maysak.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
