Vinçi ndërtimit bie mbi tren/ 32 të vdekur dhe 66 të plagosur në Tajlandë

Të paktën 32 persona kanë humbur jetën dhe 66 të tjerë janë plagosur pasi një vinç ndërtimi ra mbi një tren në lëvizje në Tajlandën verilindore.

Vinçi nxori trenin nga shinat dhe shtypi disa nga vagonët e tij, njëri prej të cilëve u përfshi nga flakët. Një njëvjeçar dhe një 85-vjeçar janë midis të plagosurve, ndërsa shtatë persona janë në gjendje kritike, sipas autoriteteve.

Zyrtarët thonë se rreth 171 pasagjerë ndodheshin në tren kur ndodhi aksidenti rreth orës 09:00 sipas orës lokale.

Hekurudha Shtetërore e Tajlandës ka nisur një hetim mbi incidentin dhe njoftoi se po ndërmerr veprime ligjore kundër kompanisë së ndërtimit përgjegjëse për vinçin.

Kompania Publike e Zhvillimit Italiano-Tajlandez tha se shprehu keqardhje dhe se do të ofrojë kompensim dhe ndihmë për familjet e atyre që vdiqën ose u plagosën.

Treni po udhëtonte nga Bangkoku për në provincën verilindore Ubon Ratchathani kur ndodhi aksidenti, duke transportuar kryesisht studentë dhe punëtorë që udhëtonin për në shkollë dhe punë në rrethe të tjera. 

Gazeta lokale "The Nation" raportoi se incidenti ndodhi ndërsa vinçi po ngrinte një pjesë të madhe betoni e cila ra mbi tren, duke shkaktuar daljen nga shinat e disa vagonëve.