Në Itali, gjatë tridhjetë viteve të fundit, gati 600 persona janë prekur nga helmimi i rëndë i shkaktuar nga toksina e botulinumit (Clostridium botulinum), e cila shkakton paralizë progresive të muskujve. Italia mban rekordin për numrin e rasteve në raport me vendet e tjera të Europës.
Botulizmi transmetohet kryesisht përmes ushqimit, dhe ushqimet e konservuara, veçanërisht ato të përgatitura në shtëpi, janë veçanërisht të rrezikshme kur nuk përgatiten siç duhet.
Ditët e fundit, në mediat italiane është raportuar për disa raste të botulizmit. Numri i të vdekurve nga helmimi me ushqim nga botulizmi ka shkuar në katër. Rastet janë kryesisht në Sardenjë dhe Kalabri, ku disa persona janë shtruar në spital pasi kanë konsumuar ushqim të kontaminuar.
Në këtë situatë, Instituti Kombëtar i Shëndetit (ISS) ka mbledhur pyetjet dhe shqetësimet e disa konsumatorëve dhe është përgjigjur me rekomandime dhe këshilla shumë të dobishme dhe gjithëpërfshirëse.
Si mund të shmanget rreziku i botulizmit?
E vetmja mënyrë e sigurt për ta parandaluar atë është të shmangni ngrënien e perimeve të konservuara jo-acidike. Por më shumë sesa vetë këto ushqime, rrezikun e sjell mënyra si janë përgatitur dhe koha kur konsumohen pas hapjes së paketimit. Mosrespektimi i rregullave mund të rezultojë në pasoja fatale. E njëjta gjë vlen edhe për turshitë e përgatitura në shtëpi.
Rreziku është toksina, jo bakteri
Toksina e botulinumit, ose neurotoksina e botulinumit, është një proteinë neurotoksike e prodhuar nga bakteri Clostridium botulinum dhe specie të ngjashme. Toksina shkakton sëmundjen e botulizmit. Ajo është e njëjta që përdoret në estetikë dhe që njihet si botoks.
Megjithatë, vetëm prania e Clostridium botulinum nuk është e mjaftueshme për të shkaktuar botulizëm. Rreziku nuk lind thjesht nga prania e bakterit ose sporeve të tij, por nga mbirja e këtyre sporeve dhe prodhimi i mëvonshëm i toksinës së botulinumit, një nga substancat natyrore më vdekjeprurëse në botë.
Sporet e C. botulinum janë shumë rezistente dhe për këtë arsye mund të mbijetojnë në perime të konservuara jo-acidike që i janë nënshtruar edhe trajtimeve intensive të nxehtësisë (pasterizim në 70-100°C). Sporet aktive bëhen të rrezikshme kur hasin kushte të favorshme për mbirje: siç është një mjedis anaerob (mungesa e oksigjenit, si në kavanoza), aciditet i ulët (mbi pH 4.6) dhe një temperaturë e përshtatshme dhome.
Një produkt, pra, mund të përmbajë spore botulinumi dhe prapëseprapë të jetë jo-toksik. Megjithatë, është potencialisht i rrezikshëm sepse sporet mund të aktivizohen pas ruajtjes së papërshtatshme, duke shkaktuar prodhimin e toksinës.
Gatimi në 121°C
Për të shmangur situatat kritike, kompanitë i bëjnë këto ushqime në temperatura që arrijnë në 121°C. Këto janë të vështira për t'u arritur në shtëpi pa ndihmën e një tenxhereje me presion. Ata që përgatisin turshi në shtëpi, pasi i kanë pastruar dhe i kanë copëtuar me kujdes perimet, duhet t'i zhytin ato në një tretësirë të vluar me ujë dhe uthull (60:40) për të paktën 2-3 minuta dhe më pas të shtojnë vaj ulliri ekstra të virgjër, duke shmangur lënien e flluskave të ajrit në enë. Sidoqoftë, nëse gjatë hapjes vini re një erë të çuditshme, praninë e mykut ose kapaku është i fryrë ose me shkumë, është mirë t'i hidhni të gjitha.
Një situatë e ngjashme me këtë që po ndodh sot në Itali ka ndodhur edhe në vitin 2013, kur produkti Prà pesto, i shitur në mijëra copë nën markat Conad, Esselunga dhe të tjera, u tërhoq nga tregu me urgjencë pas dyshimeve për kontaminim nga C. botulinum. Pas një fundjave në të cilën menaxherët e supermarketeve ishin të tmerruar nga mundësia e një rasti fatal të botulizmit të shkaktuar nga një pesto që mbante markën e tyre, testet për fat të mirë konfirmuan praninë e bakterit, por asnjë prodhim toksinash dhe për këtë arsye asnjë rrezik.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
