Emiratet e Bashkuara Arabe kanë raportuar një sulm me dron pranë centralit bërthamor Barakah në Abu Dhabi, duke e cilësuar incidentin si një “përshkallëzim të rrezikshëm” në tensionet rajonale.
Sipas Ministrisë së Mbrojtjes, tre dronë hynë në hapësirën ajrore të vendit nga drejtimi i kufirit perëndimor. Dy prej tyre u interceptuan nga mbrojtja ajrore, ndërsa droni i tretë goditi një gjenerator elektrik jashtë perimetrit të brendshëm të centralit Barakah, duke shkaktuar zjarr.
Autoritetet konfirmuan se nuk ka të lënduar dhe se incidenti nuk ka ndikuar në sigurinë radiologjike të impiantit, i cili vazhdon të funksionojë normalisht.
Ministria e Jashtme e Emirateve e dënoi sulmin si një “akt të papranueshëm agresioni”, duke theksuar se shënjestrimi i objekteve paqësore bërthamore përbën shkelje të së drejtës ndërkombëtare dhe të Kartës së OKB-së.
Edhe Agjencia Ndërkombëtare e Energjisë Atomike reagoi ndaj incidentit. Drejtori i përgjithshëm Rafael Grossi shprehu “shqetësim të thellë”, duke paralajmëruar se çdo aktivitet ushtarak që rrezikon sigurinë bërthamore është i papranueshëm.
Zyrtarët emiratas nuk kanë identifikuar ende autorët e sulmit, megjithëse Abu Dhabi ka akuzuar më herët Iranin për sulme ndaj infrastrukturës energjetike në rajon. Incidenti vjen në një kohë tensionesh të vazhdueshme mes Iranit, SHBA-së dhe aleatëve të Gjirit Persik, pavarësisht armëpushimit të arritur në prill.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
