Presidenti i Shteteve të Bashkuara, Donald Trump, ka deklaruar se Izraeli dhe Libani kanë arritur një marrëveshje për armëpushim 10-ditor, njofton BBC.
Sipas Trump, marrëveshja është arritur pas bisedave që ai zhvilloi me presidentin e Libanit, Joseph Aoun, dhe kryeministrin e Izraelit, Benjamin Netanyahu.
“Këta dy udhëheqës janë pajtuar që, për të arritur paqe mes vendeve të tyre, të nisin zyrtarisht një armëpushim 10-ditor në orën 17:00 sipas kohës lindore amerikane”, deklaroi Trump.
Ai shtoi se palët janë takuar së fundmi në Uashington, në bisedime që sipas tij përbëjnë kontaktet e para të nivelit të tillë pas dekadash, me pjesëmarrjen edhe të sekretarit amerikan të Shtetit, Marco Rubio.
Sipas raportimeve ndërkombëtare, kryeministri libanez e ka mirëpritur marrëveshjen, ndërsa pala izraelite ende nuk ka dhënë një reagim zyrtar, por ka thirrur një mbledhje urgjente të kabinetit.
Mediat raportojnë gjithashtu se Hezbollahu, i mbështetur nga Irani, ka paraqitur disa kushte për çdo marrëveshje armëpushimi, përfshirë kufizime në lëvizjen e trupave izraelite.
Burime ushtarake izraelite, ndërkohë, citohet të kenë deklaruar se nuk planifikohet tërheqje nga Libani jugor gjatë periudhës së armëpushimit.
Në një postim në rrjetin e tij Truth Social, Trump tha se do të ftojë në Shtëpinë e Bardhë liderët e të dy vendeve për bisedime të mëtejshme, duke i cilësuar këto si negociatat më të rëndësishme mes Izraelit dhe Libanit që nga vitet ’80.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
