Ngrënia e vakteve dhe ushqimeve të lehta brenda një periudhe të kufizuar kohore gjatë ditës dhe shmangia e ushqimit disa orë para gjumit mund të ndihmojnë në ngadalësimin e rënies njohëse në moshë të avancuar, sipas një studimi paraprak shkencor.
Hulumtimi, i kryer te gra të moshuara që jetonin me mbipeshë ose obezitet, zbuloi se ato që konsumuan ushqim brenda një dritareje nëntë-orëshe patën përmirësime më të dukshme në disa aftësi mendore krahasuar me ato që shpërndanë vaktet gjatë një periudhe më të gjatë të ditës.
Studimi u drejtua nga Prof. Sue Shapses nga Universiteti Rutgers në SHBA dhe përfshiu 47 gra të moshës 50 deri në 79 vjeç. Të gjitha pjesëmarrëset u udhëzuan të reduktonin rreth 500 kalori nga dieta e tyre ditore për gjashtë muaj. Një grup prej 26 grash ndoqi një regjim me ushqyerje të kufizuar në kohë, zakonisht duke ngrënë nga ora 10:00 deri në 18:00, ndërsa grupi tjetër i shpërndau vaktet përgjatë rreth 12 orëve.
Në përfundim të periudhës së studimit, të dy grupet humbën një peshë të ngjashme, rreth 7 kilogramë mesatarisht. Megjithatë, testet njohëse treguan se grupi që hante brenda një periudhe më të shkurtër pati rezultate më të mira në planifikimin hapësinor dhe zgjidhjen e problemeve. Studiuesit vunë re gjithashtu më pak gabime në disa teste të kujtesës dhe të të nxënit.
Prof. Shapses tha se përfitimet ishin “modeste”, por rezultatet sugjerojnë se koha kur hamë mund të ketë ndikim krahas asaj që konsumojmë. Sipas saj, kufizimi i ushqyerjes në një dritare prej tetë deri në nëntë orësh dhe ndërprerja e vakteve rreth katër orë para gjumit mund të sjellë përfitime shtesë për shëndetin njohës.
Demenca mbetet një nga shkaqet kryesore të vdekshmërisë në botë. Ndërsa disa faktorë rreziku, si mosha dhe gjenetika, nuk mund të ndryshohen, ekspertët vlerësojnë se një pjesë e rasteve mund të vonohen përmes ndryshimeve në stilin e jetesës. Mbipesha në moshën e mesme lidhet gjithashtu me rritjen e rrezikut për demencë në vitet e mëvonshme.
Studiuesit besojnë se ndikimi i ushqyerjes së kufizuar në kohë mund të lidhet me ritmet biologjike të trupit, metabolizmin dhe uljen e proceseve inflamatore.
Prof. Wendy Hall nga King's College London, e cila nuk ishte pjesë e studimit, tha se kufizimi i orarit të ushqyerjes mund të mbështesë shëndetin e trurit, jo vetëm përmes kontrollit të peshës, por edhe duke ndikuar në nivelin e sheqerit në gjak, funksionin e enëve të gjakut dhe inflamacionin.
Megjithatë, ekspertët theksojnë se rezultatet janë ende paraprake dhe nevojiten studime më të mëdha për të konfirmuar nëse këto ndryshime sjellin përfitime të qëndrueshme dhe të rëndësishme klinikisht.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
