Hëna e Plotë e Luleshtrydhes ndriçon qiellin, shfaqet në orët e para të së martës

Në orët e para të së martës, qielli do të ndriçohet nga Hëna e Plotë e Luleshtrydhes, një nga fenomenet më të bukura astronomike të vitit. 

Ajo do të arrijë kulmin e saj në orën 02:56, kur do të jetë përballë Diellit dhe do të duket plotësisht e ndriçuar. Pavarësisht emrit, Hëna nuk do të marrë ngjyrën e luleshtrydhes. 

Ky emërtim vjen nga popujt indigjenë të Amerikës së Veriut, të cilët e lidhnin hënën e plotë të qershorit me periudhën kur piqeshin dhe korreshin luleshtrydhet e egra.

Në disa kultura evropiane ajo njihet edhe si “Hëna e Trëndafilave” ose “Hëna e Mjaltit”, emra që lidhen me lulëzimin e natyrës dhe traditat e stinës. 

Fenomeni do të jetë i dukshëm me sy të lirë nëse kushtet atmosferike janë të favorshme, ndërsa pranë horizontit Hëna mund të duket më e madhe dhe të marrë nuanca të arta ose portokalli, falë një efekti optik të krijuar nga atmosfera e Tokës. 

Për adhuruesit e astronomisë, kjo është një mundësi e shkëlqyer për të shijuar një nga pamjet më spektakolare të qiellit veror.