Organi më i lartë i sigurisë kombëtare i Iranit ka paralajmëruar se një përgjigje është “e afërt” pas sulmit izraelit që shënjestroi aleatin e Teheranit, Hezbollahun, në periferitë jugore të Bejrutit.
Në një deklaratë të publikuar të dielën në platformën X, Këshilli i Lartë i Sigurisë Kombëtare i Iranit theksoi se reagimi ndaj sulmit do të jetë i menjëhershëm.
“Përgjigja e luftëtarëve të Islamit është e menjëhershme. Libani është jeta jonë dhe shkelja e vijave të kuqe të Republikës Islamike nuk do të tolerohet”, thuhet në deklaratë.
Ndërkohë, presidenti amerikan Donald Trump ka kritikuar sulmin izraelit ndaj periferive jugore të kryeqytetit libanez, duke argumentuar se ai rrezikon përpjekjet diplomatike për arritjen e një marrëveshjeje paqeje mes Shteteve të Bashkuara dhe Iranit.
Në një postim në Truth Social, Trump deklaroi se sulmi “nuk duhej të kishte ndodhur”, duke shtuar se Uashingtoni dhe Teherani janë “shumë afër” një marrëveshjeje që mund të kontribuojë në stabilitetin rajonal.
“Izraeli ka të drejtë të mbrohet nga kërcënimet, por sulmi ndaj të cilit po përgjigjej ishte shumë i vogël dhe i pakuptimtë. Askush nuk u lëndua, nuk u plagos apo nuk u vra dhe kjo nuk duhet të prishë këtë proces të rëndësishëm”, shkroi Trump.
Ai u bëri thirrje të gjitha palëve të shmangin përshkallëzimin e mëtejshëm të situatës, duke kërkuar ndalimin e sulmeve izraelite në Liban, por edhe ndërprerjen e çdo sulmi nga Hezbollahu kundër Izraelit.
“Sot jemi shumë afër një marrëveshjeje që mund të sjellë paqe në rajon, përfshirë Libanin. Ky mund të jetë fillimi i një paqeje të gjatë dhe të qëndrueshme. Të mos e prishim këtë mundësi”, përfundoi Trump.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
