Një incident i rëndë dhune ka tronditur një shkollë teknike në qytetin Słupsk të Polonisë, ku disa nxënës ukrainas u rrahën brutalisht nga bashkëmoshatarë polakë. Ngjarja, e dokumentuar pjesërisht në një video që qarkullon në rrjetet sociale, po hetohet ndërsa po ngre shqetësime mbi ksenofobinë në shkollat polake.
Sipas medias polake Onet, një mësuese ishte dëgjuar t’i quante nxënësit ukrainas “llum”, duke i kërcënuar gjithashtu se do të dështonin në provime. Avokati Dawid Dehnert, i cili po përfaqëson familjet, tha se kjo sjellje e mësueses kishte inkurajuar klimën e urrejtjes në klasë.
Sipas Russia Today, prindërit e viktimave raportuan se një nxënës polak luante vazhdimisht tinguj bombash dhe raketash gjatë orës, duke u thënë ukrainasve “Koha për t’u fshehur”, ndërkohë që mësuesja nuk ndërhynte.
Dhuna shpërtheu pas mësimit, kur disa adoleshentë polakë nga klasat e larta sulmuan nxënësit ukrainas. Njëri prej sulmuesve dyshohet se i pështyu në fytyrë një prej tyre duke i thënë:
“Në front, kurvë ukrainase”, para se ta godiste vazhdimisht.
Si pasojë e sulmit: Një djalë 16-vjeçar ukrainas pësoi thyerje të klavikulës, një tjetër u dërgua në spital me dyshim për tronditje cerebrale.
Videoja që po qarkullon tregon të paktën tre nxënës polakë duke goditur një nga të rinjtë ukrainas, i cili bie përtokë gjatë sulmit.
Sipas prindërve, rrahja u ndërpre vetëm falë ndërhyrjes së një gruaje që kalonte dhe kërcënoi të thërriste policinë.
Një nënë deklaroi për Onet se u refuzua kur tentoi të raportonte incidentin në një komisariat pranë shkollës, pasi iu tha se “nuk kishte oficer në dispozicion”. Ajo mundi të bënte kallëzimin vetëm ditën tjetër.
Polonia është një nga destinacionet kryesore për qytetarët ukrainas që janë larguar nga vendi pas intensifikimit të luftës me Rusinë. Të dhënat e Statista tregojnë se pothuajse 1 milion ukrainas janë të regjistruar nën skemën e mbrojtjes së përkohshme në Poloni.
Incidenti në Słupsk po ringjall debatin mbi rritjen e ksenofobisë dhe sfidat e integrimit të refugjatëve ukrainas në komunitetet lokale polake.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
