Dubai ka nisur një program të ri stimujsh për të nxitur rikthimin e turistëve, mes sfidave që sektori i turizmit thuhet se po përballet pas tensioneve të fundit në Lindjen e Mesme.
Sipas një raporti të CNN, autoritetet e Emiratit kanë prezantuar nismën “A Dubai Invitation”, e cila u ofron banorëve dhe qytetarëve të Emirateve të Bashkuara Arabe shpërblime me vlerë deri në 3,000 AED për ftesën e familjarëve ose miqve që të vizitojnë Dubain.
Programi, i cili është në fuqi deri më 31 tetor, u lejon personave mbi 18 vjeç me dokument identifikimi të vlefshëm të Emirateve të nominojnë deri në tre vizitorë.
Përfitimet përfshijnë oferta për akomodim në hotele dhe shërbime gastronomike, ndërsa të ftuarit duhet të jenë rezidentë jashtë Emirateve të Bashkuara Arabe dhe të hyjnë në vend me vizë turistike të vlefshme.
Zëvendëspresidentja për Projekte Speciale dhe Rajonin MENA në Departamentin e Ekonomisë dhe Turizmit të Dubait, Noor Al Geziry, deklaroi se nisma synon të mbështetet te besimi dhe lidhjet personale për të promovuar destinacionin tek vizitorët e rinj.
Sipas raportimit, programi është pjesë e një pakete më të gjerë masash për të rigjallëruar turizmin, ku përfshihen edhe lehtësira fiskale për sektorin hotelier dhe atë të restoranteve.
CNN raporton se turizmi në Dubai është ndikuar nga tensionet rajonale dhe perceptimi i pasigurisë, pavarësisht se infrastruktura turistike, aeroportet, hotelet dhe atraksionet vijojnë të funksionojnë.
Përfaqësues të industrisë vlerësojnë se sfida kryesore mbetet rikthimi i besimit të turistëve ndërkombëtarë, pasi shumë udhëtarë e perceptojnë Lindjen e Mesme si një rajon të vetëm, pa bërë dallime mes vendeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
