Yum! Brands ka njoftuar shitjen e zinxhirit të njohur të restoranteve Pizza Hut në një marrëveshje me vlerë totale prej 2.7 miliardë dollarësh, duke i dhënë fund një kapitulli të gjatë në historinë e kompanisë.
Sipas marrëveshjes, firma e kapitalit privat LongRange Capital do të blejë operacionet e markës jashtë Kinës kontinentale për 1.5 miliardë dollarë, ndërsa Yum China Holdings do të marrë në pronësi aktivitetin e Pizza Hut në Kinën kontinentale për 1.2 miliardë dollarë.
Shitja vjen pas disa viteve sfiduese për Pizza Hut, e cila ka hasur vështirësi në ruajtjen e pozicionit të saj në tregun global të picave.
Kompania është përballur me konkurrencë gjithnjë e më të fortë nga rivalë si Domino’s, Papa John’s dhe Little Caesars, të cilët kanë fituar terren përmes ofertave më konkurruese dhe strategjive të fokusuara te shpërndarja e shpejtë.
Përveç presionit nga konkurrentët e mëdhenj, Pizza Hut është sfiduar edhe nga zinxhirë më të vegjël rajonalë, të cilët janë përshtatur më shpejt me kërkesat e konsumatorëve.
Ndryshimi i zakoneve të blerjes dhe rritja e përdorimit të platformave të shpërndarjes së ushqimit kanë transformuar tregun, duke e bërë më të vështirë për markat tradicionale të ruajnë dominimin e tyre.
Drejtori ekzekutiv i Yum! Brands, Chris Turner, u shpreh se Pizza Hut mbetet një nga markat më ikonike të industrisë së restoranteve dhe se pronarët e rinj do të kenë mundësinë ta zhvillojnë më tej biznesin.
Sipas tij, ekspertiza e LongRange Capital dhe Yum China do të krijojë kushtet e nevojshme për rritje dhe modernizim të markës në vitet e ardhshme.
Pizza Hut u themelua në vitin 1958 nga dy vëllezër në Wichita të Kansasit dhe u shndërrua në një nga rrjetet më të njohura të restoranteve në botë.
Kompania u ble nga PepsiCo në vitin 1977 dhe më pas u bë pjesë e Yum! Brands pas ndarjes së biznesit në vitin 1997.
Me këtë lëvizje strategjike, Yum! Brands synon të përqendrojë më shumë burime dhe investime te markat e tjera kryesore të portofolit të saj, përfshirë KFC dhe Taco Bell.
Transaksionet me LongRange Capital dhe Yum China pritet të përfundojnë gjatë tremujorit të tretë të vitit 2026, pasi të marrin miratimet e nevojshme rregullatore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
