Shtetet e Bashkuara të Amerikës kanë paralajmëruar kompanitë e transportit detar se mund të përballen me sanksione nëse kryejnë pagesa ndaj Iranit për të siguruar kalim të lirë në Ngushticën e Hormuzit.
Në një njoftim të publikuar të premten, Zyra për Kontrollin e Aseteve të Huaja (OFAC) theksoi se personat dhe kompanitë amerikane janë përgjithësisht të ndaluara të bëjnë pagesa ndaj entiteteve qeveritare iraniane.
Ndërkohë, edhe subjektet jo-amerikane mund të përballen me rrezik sanksionesh nëse kryejnë pagesa të tilla.
“Pjesëmarrësit në industrinë detare që operojnë me anije që ndalojnë në portet iraniane përballen me rrezik të konsiderueshëm sanksionesh sipas disa autoriteteve që synojnë sektorin detar dhe portual të Iranit”, thuhet në deklaratë.
Sipas raportimeve, Irani ka kufizuar ndjeshëm trafikun në Ngushticën e Hormuzit që prej fillimit të luftës në muajin shkurt.
Nga ana tjetër, SHBA ka vendosur një bllokadë detare ndaj porteve iraniane.
Teherani e ka cilësuar ndërhyrjen amerikane ndaj anijeve që hyjnë dhe dalin nga portet iraniane si “pirateri”.
Autoritetet iraniane pretendojnë se kanë vendosur tarifa për anijet që kërkojnë kalim të sigurt në ngushticë.
Zëvendëskryetari i Parlamentit iranian, Hamidreza Haji Bababei, deklaroi javën e kaluar se të ardhurat e para nga këto tarifa janë depozituar në Bankën Qendrore të vendit.
Megjithatë, nuk janë dhënë detaje të mëtejshme mbi shumën, mënyrën e pagesës apo identitetin e palëve që kanë kryer këto pagesa, dhe këto pretendime nuk janë verifikuar në mënyrë të pavarur.
OFAC paralajmëroi se pagesat mund të kryhen jo vetëm në para, por edhe përmes “aseteve digjitale, kompensimeve, shkëmbimeve informale apo formave të tjera në natyrë”, përfshirë donacione bamirësie apo pagesa në ambasadat iraniane.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
