Shtetet e Bashkuara dhe Irani kanë rënë dakord të shmangin përshkallëzimin e mëtejshëm të konfliktit pas shkëmbimit të sulmeve në ditët e fundit, raportojnë mediat amerikane duke cituar një zyrtar të administratës amerikane.
Sipas CBS News, anijet tregtare do të mund të lundrojnë lirshëm në Ngushticën e Hormuzit, ndërsa negociatat për një marrëveshje që do t'i jepte fund konfliktit do të vazhdojnë.
Megjithatë, ka paqartësi lidhur me zhvillimin e bisedimeve. Zëvendësministri i Jashtëm iranian, Kazem Gharibabadi, deklaroi të hënën se nuk ka plane për takime teknike gjatë kësaj jave. Në të kundërt, presidenti amerikan Donald Trump njoftoi në rrjetin Truth Social se Irani ka kërkuar një takim, i cili sipas tij do të zhvillohet në Doha, kryeqytetin e Katarit.
Më 17 qershor, SHBA-ja dhe Irani nënshkruan një Memorandum Mirëkuptimi me 14 pika, ku parashikohej ndërprerja e menjëhershme dhe e përhershme e operacioneve ushtarake, si edhe garantimi nga Teherani i kalimit të sigurt të anijeve tregtare në Ngushticën e Hormuzit për një periudhë 60-ditore.
Megjithatë, armëpushimi është vënë në pikëpyetje pas incidenteve të fundit. Tensionet u rikthyen pasi një predhë iraniane goditi një anije mallrash në Ngushticën e Hormuzit. Si kundërpërgjigje, SHBA-ja ndërmori sulme ndaj objektivave iraniane, të cilat Komanda Qendrore Amerikane (CENTCOM) i cilësoi si reagim ndaj sulmeve të vazhdueshme kundër transportit detar.
Irani u përgjigj me sulme ndaj bazave amerikane në Kuvajt dhe Bahrein, por sipas Uashingtonit, raketat nuk goditën objektivat dhe nuk shkaktuan viktima apo dëme.
Ngushtica e Hormuzit mbetet një nga korridoret më strategjike për transportin global të naftës dhe gazit, ndërsa çdo përshkallëzim në këtë zonë rrit shqetësimet për stabilitetin e tregjeve ndërkombëtare të energjisë.
Ndërkohë, SHBA-ja ndërmjetësoi edhe një marrëveshje kornizë mes Izraelit dhe Libanit, me synimin për të krijuar kushtet për një paqe më të qëndrueshme. Megjithatë, situata në jug të Libanit mbetet e tensionuar, pasi Hezbollahu e ka refuzuar marrëveshjen, ndërsa ushtria izraelite ka vijuar operacionet ushtarake, duke deklaruar se ka shkatërruar një tunel të përdorur nga grupi i armatosur.
Teherani këmbëngul se çdo marrëveshje më e gjerë për armëpushim në rajon do të jetë e zbatueshme vetëm nëse ndalen edhe armiqësitë në Liban.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
