Uragani Melissa ka marrë jetën e gati 50 personave në karaibe, raportoi Associated Press të premten.
Sipas të dhënave të fundit, 19 persona kanë vdekur në Xhamajka dhe 30 në Haiti si pasojë e katastrofës. Megjithatë, ekipet e shpëtimit në të dy vendet nuk e përjashtojnë mundësinë e një numri më të lartë viktimash, pasi operacionet e kërkim-shpëtimit janë duke vazhduar.
Ndërkohë, 18 persona të tjerë në Haiti konsiderohen të zhdukur, dhe mijëra persona janë ende në strehim të përkohshëm, pasi janë evakuuar nga shtëpitë e tyre në jug dhe juglindje të vendit.
Ministria e Energjisë e Xhamajkës raportoi se afërsisht 500.000 persona mbeten pa energji elektrike, dhe shërbimi telefonik është gjithashtu i prekur. Uragani ka shkaktuar dëme të konsiderueshme në infrastrukturën e vendit.
Ekipet e shpëtimit në Kubë po vazhdojnë gjithashtu të merren me pasojat e katastrofës, pa raportuar për viktima. Shumë zona janë përmbytur dhe shtëpi e ndërtesa të tjera janë dëmtuar.
Në total, mbi 730.000 persona janë evakuuar në Kubën lindore.
Melissa është aktualisht një uragan i Kategorisë 2 në shkallën Saffir-Simpson, me erëra maksimale të qëndrueshme prej afërsisht 165 km/orë. Qendra e uraganit ndodhet 420 km në perëndim të Bermudës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
