Lideri i Koresë së Veriut Kim Jong Un do të udhëtojë në Kinë për të marrë pjesë në festimet që shënojnë 80-vjetorin e përfundimit të Luftës së Dytë Botërore, me ftesë të Presidentit kinez Xi Jinping, në një udhëtim shumë të rrallë jashtë vendit për udhëheqësin e Phenianit.
Pekini do të organizojë festime më 3 shtator, mes tyre një paradë ushtarake, për të përkujtuar fitoren kundër Japonisë në vitin 1945. Republika Popullore pret që 26 udhëheqës ndërkombëtarë të marrin pjesë në festime.
“Kim së shpejti do të vizitojë Republikën Popullore të Kinës me ftesë të Xi Jinping për të marrë pjesë në festimet që shënojnë 80-vjetorin e fitores së Luftës së Rezistencës së Popullit Kinez Kundër Agresionit Japonez dhe Luftës Botërore Antifashiste”, raportoi KCNA.
Ndërkohë, zëvendësministri i Jashtëm kinez Hong Lei njoftoi se Kim do të marrë pjesë në paradën ushtarake më 3 shtator, duke e renditur midis udhëheqësve të 26 vendeve të huaja që pritet të marrin pjesë në këtë ngjarje me ftesë të Xi-së.
Mediat kineze raportuan se midis të ftuarve ishin Presidenti rus Vladimir Putin, Kryetari i Asamblesë Kombëtare të Koresë së Jugut Woo Won-shik, si dhe udhëheqës të Vietnamit, Indonezisë dhe Iranit.
Udhëtimi i rrallë i Kim vjen në një kohë kur Koreja e Veriut dhe Kina tregojnë shenja se duan të rivendosin marrëdhëniet dypalëshe, mes afrimit të Phenianit me Moskën pasi Koreja e Veriut dërgoi trupa për të mbështetur luftën e Rusisë në Ukrainë.
Që kur erdhi në pushtet në vitin 2011, Kim e ka vizituar Kinën katër herë, së pari në vitin 2018 dhe së fundmi në vitin 2019. Në të gjitha këto raste ai u takua me Xi-në, me të cilin marrëdhëniet janë të njohura për tensionet e tyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
