Kompania suedeze e inteligjencës artificiale Lovable ka vendosur t’u rrisë automatikisht pagën me 10% punonjësve të saj në çdo përvjetor të punësimit.
Vendimi u bë publik nga drejtori i kompanisë, Anton Osika, i cili deklaroi në rrjetin X se punonjësit bëhen më të vlefshëm me kalimin e kohës dhe nuk duhet të shqetësohen nëse do të marrin apo jo rritje page.
Kjo strategji vjen në një periudhë kur kompanitë e inteligjencës artificiale po konkurrojnë fort për të tërhequr dhe mbajtur specialistët më të mirë të sektorit.
E themeluar në vitin 2023, Lovable arriti në fund të vitit 2025 një vlerë tregu prej 6.6 miliardë dollarësh, duke u kthyer në një nga kompanitë më të rëndësishme europiane në fushën e inteligjencës artificiale gjenerative.
Modeli i rritjes automatike të pagave synon edhe shmangien e pakënaqësive dhe diskutimeve të brendshme për diferencat në paga, fenomen që shpesh ndikon në performancën e ekipeve të teknologjisë.
Megjithatë, kjo praktikë nuk pritet të përhapet lehtësisht edhe në sektorë të tjerë.
Disa drejtues kompanish kanë deklaruar se një model i tillë është i vështirë të zbatohet jashtë industrisë së inteligjencës artificiale, ndërsa shumë biznese vazhdojnë të preferojnë bonuset e lidhura me rezultatet dhe performancën.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
