Nëntë persona, përfshirë gjashtë pasagjerë dhe tre anëtarë të ekuipazhit, u dërguan në spital pasi turbulenca të forta goditën një fluturim me destinacion Nju Jorkun sot në mëngjes, duke i detyruar pilotët të devijonin avionin në Aeroportin Ndërkombëtar të Miamit.
Sipas AP News, incidenti ndodhi në një fluturim të operuar nga linja ajrore Avianca nga Medellin, Kolumbi, me destinacion Aeroportin Ndërkombëtar JFK të Nju Jorkut. Sipas Autoriteteve të Aeroportit të Miamit, avioni, që operonte fluturimin AV42, hasi turbulenca të forta gjatë udhëtimit.
Menjëherë pasi avioni bëri një ulje emergjente në Miami, shërbimet e emergjencës u mobilizuan për të ofruar ndihmë për pasagjerët dhe anëtarët e ekuipazhit që ishin plagosur ose kishin probleme shëndetësore për shkak të turbulencave.
Përfaqësuesit e Avianca konfirmuan për CBS News Miami se gjithsej nëntë persona kishin nevojë për kujdes mjekësor, duke specifikuar se këta ishin gjashtë pasagjerë dhe tre anëtarë të ekuipazhit.
Në të njëjtën kohë, Administrata Federale e Aviacionit të SHBA-së (FAA) njoftoi se do të hetonte rrethanat në të cilat ndodhi incidenti. Deri më tani, nuk janë dhënë detaje të mëtejshme rreth shkallës së lëndimeve të nëntë personave që u dërguan në spital.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
