Ushtria amerikane ka përdorur pjesën më të madhe të rezervave të saj të raketave tokë-tokë me rreze të gjatë dhe precizion të lartë gjatë konfliktit pesëmujore me Iranin, duke ngritur shqetësime për kapacitetin e saj për t’u përballur me kriza të tjera të mundshme, sipas burimeve të njohura me të dhënat.
Bëhet fjalë kryesisht për sistemet raketore ATACMS dhe Raketa me Sulm Preciz (PrSM), municione me vlerë mbi 1 milion dollarë secila, të cilat i lejojnë ushtrisë amerikane të godasë objektiva nga distanca të mëdha pa ekspozuar forcat në terren ndaj rrezikut të drejtpërdrejtë.
Sipas burimeve, SHBA-të kanë përdorur pothuajse të gjitha rezervat e këtyre raketave që ishin në dispozicion para fillimit të luftës. Rënia e furnizimeve ka shkaktuar debate brenda administratës amerikane mbi kohëzgjatjen e operacioneve ushtarake dhe ndikimin e tyre në aftësinë e Uashingtonit për t’iu përgjigjur kërcënimeve të tjera, përfshirë nga Rusia dhe Kina.
ATACMS janë përdorur më parë edhe në Ukrainë, ku i kanë mundësuar forcave ukrainase të godasin objektiva në distanca të mëdha. Ndërkohë, raketat PrSM përfaqësojnë gjeneratën e re të armëve që pritet të zëvendësojnë gradualisht ATACMS.
Ekspertët paralajmërojnë se mungesa e raketave precize mund ta detyrojë ushtrinë amerikane të mbështetet më shumë te operacionet ajrore me avionë të drejtuar, të cilat konsiderohen më të rrezikshme në zonat me mbrojtje të fortë ajrore.
Shtëpia e Bardhë ka kundërshtuar shqetësimet për mungesën e municioneve, duke deklaruar se SHBA-të kanë një arsenal më të madh se çdo vend tjetër dhe se industria amerikane e mbrojtjes po rrit prodhimin në nivele rekord.
Megjithatë, analistët theksojnë se rritja e prodhimit nuk e zgjidh menjëherë problemin e furnizimeve, pasi një konflikt i zgjatur kërkon rezerva të mëdha dhe kapacitete të vazhdueshme prodhimi.
Pentagoni ka deklaruar se ushtria amerikane mbetet plotësisht e aftë të kryejë operacionet e saj dhe të mbrojë interesat e Shteteve të Bashkuara, ndërsa vazhdon procesi i rritjes së prodhimit dhe rimbushjes së rezervave strategjike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
