Qeveria spanjolle ka vendosur të tërheqë ambasadorin e saj në Izrael, një veprim që vjen në mes të kritikave të vazhdueshme të Madridit ndaj veprimeve ushtarake izraelite në Gaza dhe përshkallëzimit të fundit të konfliktit në Lindjen e Mesme.
Vendimi u publikua të mërkurën në gazetën zyrtare shtetërore të Spanjës, ku thuhet se me propozim të Ministrit të Punëve të Jashtme dhe pas shqyrtimit nga Këshilli i Ministrave në mbledhjen e 10 marsit 2026, është ndërprerë emërimi i Ana María Sálomon Pérez si Ambasadore e Spanjës në Shtetin e Izraelit.
Sipas një burimi nga Ministria e Jashtme spanjolle, ambasada e Spanjës në Tel Aviv do të drejtohet përkohësisht nga një i ngarkuar me punë.
Ky hap diplomatik vjen në një kohë kur Spanja është shfaqur si një nga kritikët më të zëshëm brenda Bashkimit Evropian ndaj ofensivës izraelite në Gaza dhe zhvillimeve të fundit ushtarake në rajon.
Kryeministri spanjoll, Pedro Sánchez, është ndër liderët e paktë evropianë që ka dënuar hapur sulmet e fundit të ndërmarra nga Shtetet e Bashkuara të Amerikës dhe Izraeli kundër Iranit, duke i cilësuar ato si “të pajustifikueshme” dhe duke theksuar se qëndrimi i qeverisë së tij është “kundër luftës”.
Qeveria e drejtuar nga Sánchez ka mbajtur gjithashtu një qëndrim kritik ndaj veprimeve ushtarake izraelite në Gaza.
Në tetor të vitit të kaluar, parlamenti spanjoll miratoi një ligj që vendos një embargo të plotë armësh ndaj Izraelit, duke ndaluar përgjithmonë shitjen e armëve, teknologjisë me përdorim të dyfishtë dhe pajisjeve ushtarake.
Vendimi për tërheqjen e ambasadores shihet si një tjetër sinjal i tensioneve në rritje mes Madridit dhe Tel Avivit në lidhje me zhvillimet në Lindjen e Mesme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
