Temperaturat arrijnë deri në 41.5°C në Evropë, vala e të nxehtit lidhet me qindra viktima

Evropa po përballet me një valë të paprecedentë të të nxehtit, ndërsa rekordet e temperaturave janë thyer në disa vende të kontinentit, duke rritur shqetësimet për ndikimin në shëndetin e njerëzve dhe mjedisin.

Gjermania regjistroi të shtunën një rekord të ri historik prej 41.5 gradë Celsius, duke tejkaluar rekordin prej 41.3 gradësh të vendosur vetëm një ditë më parë. Rekorde të reja u shënuan gjithashtu në Danimarkë, Republikën Çeke dhe Zvicër, ndërsa vala e të nxehtit po përhapet drejt veriut dhe lindjes së Evropës.

Sipas të dhënave, rreth 150 milionë njerëz në Evropë po përjetojnë temperatura mbi 35 gradë Celsius. Organizata Botërore Meteorologjike ka paralajmëruar se kjo valë e të nxehtit do të ketë pasoja të mëdha për shëndetin publik dhe ekosistemet.

Në Republikën Çeke u regjistrua temperatura rekord prej 40.8 gradë Celsius në Doksany, ndërsa Danimarka shënoi 37 gradë Celsius në Odum, duke thyer rekordin e vendosur në vitin 1976. Edhe Zvicra regjistroi ditën më të nxehtë të muajit qershor, me temperaturat që arritën në 39 gradë Celsius në Bazel.

Meteorologët shpjegojnë se fenomeni është shkaktuar nga një "kupolë nxehtësie", një sistem i qëndrueshëm me presion të lartë që bllokon ajrin e nxehtë dhe mban qiellin pa re, duke favorizuar rritjen e vazhdueshme të temperaturave.

Pasojat e valës së të nxehtit po bëhen gjithnjë e më të dukshme. Në Francë, numri i viktimave nga mbytja ka arritur të paktën në 55 persona, ndërsa autoritetet shëndetësore raportojnë rreth 1,000 vdekje shtesë gjatë periudhës së temperaturave ekstreme. Në Spanjë, sistemi kombëtar i monitorimit të vdekshmërisë ka regjistruar 327 vdekje që dyshohet se lidhen me vapën.

Shkencëtarët theksojnë se Evropa është kontinenti që po ngrohet më shpejt në botë dhe vlerësojnë se një valë e tillë e të nxehtit në fillim të verës do të kishte qenë pothuajse e pamundur pa ndikimin e ndryshimeve klimatike.

Sipas parashikimeve, temperaturat mbi 40 gradë Celsius do të vazhdojnë edhe në fillim të javës në disa zona të Evropës, megjithëse më vonë pritet një rënie graduale e temperaturave, fillimisht në pjesën perëndimore të kontinentit.