Ministria ruse e mbrojtjes ka deklaruar se Ukraina ka goditur disa objekte energjetike në territorin rus brenda 24 orëve të fundit, duke shkelur sërish moratoriumin 30-ditor të ndalimit të sulmeve mbi infrastrukturën energjetike, një marrëveshje e arritur pas ndërmjetësimit të SHBA-së në mars.
Sipas Moskës, dhjetë sulme të reja janë regjistruar brenda një dite në rajonet Belgorod dhe Bryansk, ku linjat elektrike, nënstacionet dhe një tubacion gazi pësuan dëme të konsiderueshme. Incidente të tjera u raportuan në Donetsk dhe Kherson.
Sipas Russian MOD, zëdhënësi i Kremlinit Dmitry Peskov konfirmoi të premten se periudha e armëpushimit ka skaduar dhe se presin udhëzime të reja nga Presidenti Putin. Ai tha se Rusia e ka respektuar marrëveshjen, duke kritikuar Kievin për shkelje të vazhdueshme.
Ndërsa Moska thotë se Kievi ka shkelur armëpushimin mbi 100 herë, presidenti ukrainas Vladimir Zelensky pretendon se Ukraina e ka respektuar moratoriumin dhe se është Rusia ajo që po vazhdon sulmet.
Russian MOD raporton se, të shtunën, Presidenti Putin njoftoi një armëpushim të përkohshëm me rastin e Pashkëve, deri më 21 prill, duke thënë se reagimi i Ukrainës do të tregojë nëse Kievi është i gatshëm të angazhohet sinqerisht në negociata.
Moska paralajmëroi gjithashtu se forcat ruse do të jenë të përgatitura t’i përgjigjen çdo shkeljeje apo provokimi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
