Spanja do të përballet duke nisur nga e marta me valën e tretë të të nxehtit gjatë këtij sezoni veror, ndërsa temperaturat pritet të ngrihen mbi 40 gradë Celsius në pjesën më të madhe të territorit, sipas agjencisë kombëtare meteorologjike.
Sipas agjencisë shtetërore meteorologjike spanjolle Aemet, kjo valë e të nxehtit do të shkaktohet nga një zonë me presion të lartë atmosferik, e cila do të bllokojë masat e ajrit të nxehtë dhe të thatë që vijnë nga Afrika e Veriut, duke i mbajtur ato mbi Spanjë për disa ditë. Si pasojë, temperaturat do të arrijnë nivele jashtëzakonisht të larta.
Parashikohet që vala e nxehtësisë të arrijë intensitetin më të madh deri të enjten, ditë që ekspertët e konsiderojnë si kulmin e mundshëm të kësaj situate ekstreme meteorologjike. Në disa zona të veçuara, temperaturat mund të kalojnë edhe 45 gradë Celsius.
“Shkalla e rrezikut do të jetë e lartë gjatë orëve më të nxehta të ditës, veçanërisht për aktivitetet në ambiente të jashtme dhe për personat më të cenueshëm”, paralajmëroi agjencia meteorologjike.
Kjo është vala e tretë e të nxehtit që prek Spanjën këtë verë. Vala e parë u regjistrua në fund të qershorit dhe solli thyerje rekordesh të temperaturave në të gjithë Evropën, ndërsa vala e dytë goditi vendin në fillim të korrikut.
Sipas të dhënave të publikuara nga Aemet, Spanja kontinentale ka kaluar gjysmën e parë të verës më të nxehtë që nga nisja e matjeve zyrtare në vitin 1961.
Temperatura mesatare gjatë periudhës nga 1 qershori deri më 15 korrik arriti në 24.5 gradë Celsius, ose 3.3 gradë më shumë se mesatarja prej 21.2 gradë Celsius e regjistruar për periudhën referuese 1991-2020.
Shkencëtarët theksojnë se ndryshimet klimatike të shkaktuara nga aktiviteti njerëzor po ndikojnë në rritjen e kohëzgjatjes, intensitetit dhe shpeshtësisë së valëve të të nxehtit.
Këto kushte ekstreme thajnë bimësinë dhe shtojnë ndjeshëm rrezikun për shpërthimin dhe përhapjen e zjarreve në pyje.
Një zjarr i madh që shpërtheu në fillim të këtij muaji në provincën juglindore të Almerias shkaktoi vdekjen e 13 personave, duke u bërë zjarri më vdekjeprurës i viteve të fundit në Spanjë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
