Temperatura ekstreme në Gadishullin Iberik, rrezik i lartë për zjarre

Disa rajone spanjolle kanë qenë nën alarm portokalli që nga sot për shkak të temperaturave të larta. 

"Temperaturat e ditës janë 5 deri në 10°C mbi normalen në pjesën më të madhe të gadishullit", raportoi Agjencia Meteorologjike Spanjolle në X.

Vala e të nxehtit ka të ngjarë të jetë e gjatë dhe të vazhdojë të paktën deri të dielën e ardhshme.

Zona të mëdha të vendit janë gjithashtu të ekspozuara ndaj një rreziku ekstrem të zjarreve në pyje. 

Zjarrfikësit po përpiqen ende të kontrollojnë një zjarr në qytetin veriperëndimor të Vilardevós, i cili ka djegur tashmë afërsisht 570 hektarë.

 Portugalia fqinje është prekur gjithashtu nga nxehtësia. Qeveria ka shpallur një rrezik shumë të lartë zjarresh nga sot deri të enjten.
Sipas Sistemit Evropian të Informacionit për Zjarret në Pyje , mbi 25,700 hektarë janë djegur në Portugali që nga fillimi i vitit. 

Shkencëtarët kanë paralajmëruar prej vitesh për ndikimin e ndryshimeve klimatike në valët e të nxehtit, thatësirat dhe ngjarjet e tjera ekstreme të motit, të cilat po bëhen gjithnjë e më intensive dhe të shpeshta.