Rritja e tensioneve mes SHBA-së, Izraelit dhe Iranit po ndikon drejtpërdrejt në ekonominë globale, duke rritur kostot për familjet, bizneset dhe qeveritë në mbarë botën.
Megjithatë, ndërsa shumë sektorë po përballen me vështirësi financiare, kompani të mëdha ndërkombëtare po regjistrojnë fitime rekord falë luftës dhe luhatjeve të tregjeve energjetike.
Sektori që ka përfituar më shumë është ai i naftës dhe gazit.
Mbyllja efektive e Ngushticës së Hormuzit, nga ku kalon rreth një e pesta e furnizimit botëror me energji, ka shkaktuar rritje të fortë të çmimeve të naftës dhe gazit.
Gjigantët europianë të energjisë si BP, Shell dhe TotalEnergies raportuan fitime miliardëshe në tremujorin e parë të vitit 2026, të ndihmuara nga luhatjet e forta në tregjet energjetike.
Edhe kompanitë amerikane ExxonMobil dhe Chevron tejkaluan pritshmëritë e analistëve dhe presin rritje të mëtejshme të fitimeve gjatë vitit.
Fitime të mëdha kanë regjistruar edhe bankat më të mëdha amerikane.
JP Morgan raportoi të ardhura rekord nga tregtimi financiar, duke ndihmuar bankën të arrijë një nga fitimet më të larta tremujore në historinë e saj. Sipas analistëve, paqëndrueshmëria e tregjeve ka shtuar aktivitetin e investitorëve, të cilët po zhvendosin kapitalet drejt aseteve më të sigurta.
Një tjetër sektor që po përfiton nga konflikti është industria e mbrojtjes.
Rritja e kërcënimeve të sigurisë ka shtyrë vendet europiane dhe SHBA-në të rrisin investimet në armë, sisteme mbrojtëse dhe pajisje ushtarake. Kompani si BAE Systems, Lockheed Martin, Boeing dhe Northrop Grumman raportuan porosi rekord dhe pritshmëri për rritje të fortë të shitjeve gjatë këtij viti.
Nga ana tjetër, lufta ka rritur interesin edhe për energjinë e rinovueshme.
Analistët thonë se pasiguria në tregun e naftës po i shtyn investitorët të kërkojnë alternativa më të qëndrueshme dhe më të sigurta energjetike. Kompani të mëdha të energjisë së gjelbër, si NextEra Energy, Vestas dhe Orsted, kanë raportuar rritje të fitimeve dhe interes më të madh nga investitorët.
Ekspertët paralajmërojnë se ndërsa disa kompani po përfitojnë miliarda nga kriza, konsumatorët në mbarë botën po përballen me çmime më të larta të energjisë, transportit dhe produkteve bazë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
