Shtetet e Bashkuara kanë bërë të ditur se po shqyrtojnë një propozim të fundit të paraqitur nga Irani, që synon zhbllokimin e Ngushticës së Hormuzit, një prej korridoreve më strategjike të energjisë në botë. Përmes kësaj ngushtice kalon rreth një e pesta e furnizimeve globale me naftë bruto dhe gaz natyror të lëngshëm.
Sipas Shtëpisë së Bardhë, Presidenti Donald Trump është takuar me këshilltarët e tij të lartë të sigurisë për të analizuar propozimin, i cili u përcoll nga Teherani përmes ndërmjetësimit të Pakistanit. Dokumenti përfshin çështje të ndjeshme si programi bërthamor iranian dhe lëvizjet në Ngushticën e Hormuzit.
Zëdhënësja e Shtëpisë së Bardhë, Karoline Leavitt, konfirmoi se propozimi është “në diskutim”, ndërsa theksoi se ende nuk është marrë asnjë vendim përfundimtar.
Sipas raportimeve, plani i propozuar do të përfshinte lehtësimin e bllokadës ndaj porteve iraniane nga SHBA-të, ndërsa Irani do të zbusë kontrollin mbi ngushticën gjatë vazhdimit të negociatave më të gjera.
Nga ana e Teheranit, zyrtarë iranianë kanë deklaruar se vendi i tyre nuk pranon diktim të politikave nga fuqitë e huaja, ndërsa përfaqësues të ministrisë së mbrojtjes kanë theksuar se Irani po mbron interesat e tij strategjike.
Sekretari amerikan i Shtetit, Marco Rubio, deklaroi për Fox News se propozimi iranian “është më i mirë nga sa pritej”, por ngriti dyshime mbi sinqeritetin e tij dhe theksoi nevojën për një marrëveshje që parandalon zhvillimin e armëve bërthamore nga Irani.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
