Kryevepra e Claude Monet “Zambakë uji”- Nymphaas e vitit 1907, u shit për 48 milionë dollarë, në ankandin e Artit Modern dhe Bashkëkohor të Sotheby’s në Londër.
Ky është çmimi më i lartë i arritur në ankand në Europë në dhjetë vitet e fundit për një vepër të piktorit impresionist.
Piktura ishte ylli i ankandit të mbrëmjes të mërkurën, më 24 qershor, duke ngjallur një konkurrencë të fortë ndërkombëtare midis koleksionistëve: të paktën pesë ofertues nga e gjithë bota, përfshirë Azinë, konkurruan për veprën përpara se ajo të pranohej përfundimisht.
Rezultati konfirmon vrullin e fortë të Monet në treg, pas suksesit të fundit të “Vetheuil, Effet du matin”, e cila u shit në Paris prillin e kaluar për 10.2 milionë euro, një çmim rekord për një vepër të artistit në Francë.
E pikturuar në një fazë vendimtare të karrierës së tij, vepra “Nymphaas” i përket ciklit të famshëm të zambakëve të ujit të pikturuar midis viteve 1904 dhe 1909, një periudhë në të cilën Monet revolucionarizoi pikturën e peizazhit.
Duke eliminuar vijën e horizontit dhe duke shpërbërë kufijtë hapësinorë, artisti e transformoi sipërfaqen e pellgut në një fushë të vazhdueshme drite, ngjyre dhe reflektimesh.
Vepra, e ekzekutuar në një format katror të rafinuar, përfaqëson një pikë kthese në evolucionin e tij artistik dhe parashikon trendet që do të ndikonin thellësisht në artin abstrakt të shekullit të 20-të, duke frymëzuar artistë si Mark Rothko.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
