Presidentja e Bankës Qendrore Evropiane (BQE), Christine Lagarde, ka lënë të hapur mundësinë që të largohet nga posti i saj para përfundimit të mandatit, për të marrë pjesë në zgjedhjet presidenciale të Francës në vitin 2027.
Në një intervistë për të përditshmen franceze Les Echos, Lagarde, e pyetur nëse mund të jepte dorëheqjen më herët për të “luajtur një rol” në garën elektorale, u përgjigj se një skenar i tillë është “i mundur”.
“Një zë evropian duhet të dëgjohet në debatin presidencial,” tha ajo, duke lënë të kuptohet se mund të angazhohet në diskutimet politike në Francë.
Megjithatë, ajo nuk sqaroi se çfarë roli konkret do të kërkonte nëse do të rikthehej në politikën franceze, duke theksuar se çdo vendim do të varet nga stabiliteti i ekonomisë evropiane.
“Duke pasur parasysh që po kalojmë përsëri një periudhë të trazuar, besoj se kapiteni i anijes së BQE-së duhet të qëndrojë në bord,” shtoi Lagarde.
Mandati i saj në krye të BQE-së përfundon në tetor 2027, rreth gjashtë muaj pas zgjedhjeve presidenciale në Francë. Kohët e fundit janë shtuar spekulimet për të ardhmen e saj, pas raportimeve se ajo mund të largohet më herët për të lehtësuar procesin e zgjedhjes së pasardhësit të saj në krye të institucionit.
Lagarde, 70 vjeçe, kishte deklaruar më herët për Wall Street Journal se synonte ta përfundonte mandatin e saj.
Në intervistën për Les Echos, ajo shtoi se, nëse do të largohej, kjo do të bëhej për të kundërshtuar rritjen e ndikimit të zërave euroskeptikë në Francë, përfshirë ato të së djathtës ekstreme.
“Nëse do të dukej sikur ka perspektiva për një rol të zvogëluar të Francës në Evropë, mendoj se është e rëndësishme të shpjegohet pse kjo do të ishte një rrugë e dhimbshme për vendin dhe qytetarët tanë,” u shpreh ajo.
Sondazhet aktuale e rendisin Marine Le Pen dhe Jordan Bardella si favoritë të mundshëm në garën presidenciale, ndërsa kandidatura e Tubimit Kombëtar pritet të qartësohet pas vendimit të një gjykate apeli për një çështje gjyqësore që lidhet me Le Pen.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
