Organizatat dhe bizneset në mbarë botën po nxitojnë të përditësojnë sistemet e tyre kompjuterike pas zbulimit të disa dobësive kritike në PHP, një nga gjuhët e programimit më të përdorura në zhvillimin e uebit prej dekadash, njofton BBC.
Hulumtuesit e sigurisë paralajmëruan se këto të meta të rënda mund të ekspozojnë miliona faqe interneti ndaj sulmeve kibernetike nëse lihen pa u riparuar.
Për këtë arsye, shumë faqe interneti u hoqën vullnetarisht nga rrjeti të mërkurën dhe të enjten si masë paraprake.
Mes tyre, qeveria e Mbretërisë së Bashkuar ka pezulluar përkohësisht disa nga shërbimet e saj zyrtare ndërsa po kryhen përditësimet emergjente.
Ministrja britanike e teknologjisë, Baronesha Lloyd e Effra, konfirmoi në Dhomën e Lordëve se 32 shërbime qeveritare janë aktualisht të padisponueshme dhe katër të tjera janë pjesërisht jashtë linje.
Zyra e Kryeministrit (Downing Street) sqaroi se asnjë shërbim i madh kritik për publikun nuk është prekur.
Ata theksuan se fakti që faqet janë hequr nga rrjeti nuk do të thotë se ato janë sulmuar nga hakerat, por po mbrohen gjatë aplikimit të arnimeve të sigurisë.
Ekspertët po punojnë ngushtë me OpenAI dhe partnerë të tjerë ndërkombëtarë për të identifikuar dhe rregulluar me shpejtësi çdo ekspozim të mundshëm në sistemet e tyre.
Olly Whitehouse, drejtor i teknologjisë në Qendrën Kombëtare të Sigurisë Kibernetike (NCSC), e quajti këtë ngjarje të një shkalle "të paprecedentë" dhe u shpreh për BBC Radio 4, se pasojat do të ndihen në mënyrë universale në mbarë uebin.
Megjithatë, ai qetësoi publikun duke thënë se deri më tani nuk ka pasur asnjë indikacion për sulme apo shkelje të suksesshme nga hakerat.
NCSC konfirmoi se organizatat e prekura po reagojnë pozitivisht ndaj këshillave të sigurisë dhe po marrin masat e nevojshme.
Pavarësisht kësaj, ekspertët paralajmërojnë se ndikimi i plotë i kësaj vrimë sigurie mund të kërkojë javë apo muaj që të bëhet plotësisht i dukshëm.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
