Grupi militant palestinez Hamas i ka bërë thirrje Iranit që të shmangë shënjestrimin e vendeve të Gjirit në përgjigje të sulmeve të fundit amerikano-izraelite, në një shenjë të rrallë publike mospajtimi me aleatin dhe mbështetësin e tij kryesor.
Në një deklaratë të publikuar të shtunën, Hamasi tha se po e ndjek me “shqetësim të thellë” përshkallëzimin e luftës mes SHBA-së, Izraelit dhe Iranit, duke përsëritur njëkohësisht “dënimin e fortë të agresionit amerikano-sionist”, që sipas tij kërcënon paqen dhe sigurinë në rajon dhe më gjerë.
Duke riafirmuar të drejtën e Iranit për t’iu përgjigjur sulmeve, Hamasi theksoi se Teherani duhet të shmangë goditjet ndaj vendeve fqinje të rajonit. Grupi u bëri gjithashtu thirrje “të gjitha shteteve të rajonit të bashkëpunojnë për të ndaluar këtë agresion dhe për të ruajtur lidhjet vëllazërore”.
Deklarata vjen ndërsa Irani ka vazhduar të godasë objektiva në vendet e Gjirit gjatë ditëve të fundit. Emiratet e Bashkuara Arabe dhe Arabia Saudite raportuan më herët për interceptime të raketave mbi territoret e tyre, ndërsa edhe Bahreini u kërkoi banorëve të strehohen pas lëshimeve të reja iraniane.
Irani ka qenë për dekada një nga mbështetësit kryesorë të Hamasit, duke i ofruar ndihmë të konsiderueshme financiare dhe teknologjike. Teherani e sheh grupin me bazë në Gaza si një pjesë të rëndësishme të rivalitetit të tij rajonal me Izraelin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
