Sekretari amerikan i Mbrojtjes, Pete Hegseth, deklaroi të premten se ka urdhëruar një tjetër sulm ndaj një anijeje pranë brigjeve të Venezuelës, në ujërat ndërkombëtare, ku janë vrarë katër persona të cilët i cilësoi si “narkoterroristë”.
Ky është sulmi i katërt i administratës Trump ndaj një rrjeti kriminal që trafikon drogë.
Sipas Hegseth, anija po transportonte sasi të mëdha narkotikësh me destinacion SHBA-në.
Ai theksoi se asnjë pjesëtar i forcave amerikane nuk është lënduar gjatë operacionit.
Presidenti Donald Trump publikoi në platformën X videon e sulmit, ku dukej një varkë e vogël që goditej nga raketat, dhe deklaroi se “një anije e ngarkuar me mjaftueshëm drogë për të vrarë 25 deri në 50 mijë njerëz” ishte ndalur para se të hynte në territorin amerikan.
Autoritetet amerikane kanë kryer tre goditje të ngjashme më herët gjatë muajit shtator pranë Venezuelës, të gjitha në ujëra që administrata Trump i cilëson si ndërkombëtare.
Në njërën prej tyre, më 2 shtator, ushtria raportoi 11 të vrarë, që sipas Trump ishin pjesëtarë të grupit kriminal Tren de Aragua.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
