Ndërron jetë në moshën 91-vjeçare Giorgio Armani

Ka ndërruar jetë në moshën 91-vjeçare stilisti dhe sipërmarrësi Giorgio Armani, një nga emrat më të famshëm të modës italiane në mbarë botën. 

I lindur në Piacenza në vitin 1934, Armani festoi ditëlindjen e 91-të më 11 korrik, por përjetoi  një verë sfiduese për sa i përket shëndetit të tij. 50 vite më parë ai do të themelonte kompaninë “Giorgio Armani”, e cila përfaqëson sot një nga gjigantët e modës në mbarë botën, me të ardhura 2,3 miliardë euro. 

Shtëpia e modës njoftoi ndarjen nga jeta të stilistit të famshëm përmes një njoftimi:

"Me hidhërim të thellë, Grupi Armani njofton ndarjen nga jeta të krijuesit, themeluesit dhe forcës së palodhur lëvizëse: Giorgio Armani. Z. Armani, siç thirrej gjithmonë me respekt dhe admirim nga punonjësit dhe bashkëpunëtorët e tij, ndërroi jetë në paqe, i rrethuar nga të dashurit e tij. I palodhur, ai punoi deri në ditët e tij të fundit, duke iu përkushtuar kompanisë, koleksioneve të saj dhe projekteve të larmishme”.