Shërbimi i Inteligjencës së Mbrojtjes daneze ka publikuar një raport alarmant ku thekson se Rusia ka intensifikuar operacionet hibride kundër vendeve të NATO-s, duke përdorur sabotazhe, sulme kibernetike shkatërruese dhe sulme me dronë në objektiva evropianë.
Sipas inteligjencës daneze, ky përshkallëzim mbart rrezikun e "pasojave shumë më të mëdha se në të kaluarën", duke përfshirë edhe viktimat në njerëz.
Ndonëse një pushtim ushtarak rus ndaj ndonjë vendi të NATO-s vlerësohet si "shumë i pamundur", ai nuk përjashtohet tërësisht.
Raporti specifikon se Moska po vepron nën presion të madh për shkak të humbjeve në Ukrainë dhe krizës ekonomike, çka po e shtyn presidentin Vladimir Putin të shfrytëzojë vitet e ardhshme si një "dritare mundësie" për të sfiduar rendin e sigurisë në Evropë, përpara se vendet evropiane të rrisin plotësisht kapacitetet e tyre ushtarake autonome deri në vitin 2030.
Shërbimi i inteligjencës konfirmoi vlerësimin e tij të mëparshëm se Rusia mund të zhvillonte një luftë lokale me një vend që kufizohet me Rusinë brenda gjashtë muajsh dhe mund të përbënte një “kërcënim të besueshëm” dhe të luftonte një luftë me “disa vende në rajonin e Baltikut” në dy vitet e ardhshme.
“Brenda afërsisht pesë vjetësh, Rusia do të jetë gati për një luftë në shkallë të gjerë në kontinentin evropian”, thuhej në të.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
