Operacioni më vdekjeprurës policor në historinë e Rio de Janeiros, Brazil, ka shkaktuar të paktën 132 persona të vdekur, sipas një numri të publikuar sot nga një organizatë publike.
“Sipas shifrave tona të fundit, numri i të vdekurve është 132”, tha për AFP Zyra e Avokatit të Publikut, një organ shtetëror i Rios që ofron ndihmë ligjore për personat në nevojë.
Guvernatori i Rios, Claudio Castro, deklaroi se numri zyrtar i të vdekurve nga operacioni antidrogë i kryer të martën ishte rreth 60, por paralajmëroi se numri i viktimave pritet të ndryshojë pasi vdekjet llogariten vetëm pas mbërritjes në morg.
Të afërmit e të vdekurve janë mbledhur në rrugët e Rios, pranë zonës ku u zhvillua operacioni, ndërsa dhjetëra trupa të pajetë shtrihen në rrugë.
Operacioni policor kundër trafikantëve të drogës nga “Comando Vermelho” (Komanda e Kuqe) në favelat Alemao dhe Penha e shndërroi Rio de Janeiron në një fushë beteje të vërtetë, duke shënuar një nga ditët më të dhunshme në historinë e tij të kohëve të fundit.
Gjatë operacionit, më i madhi për sa i përket numrit të viktimave të kryer ndonjëherë në Brazil, u sekuestruan 93 pushkë dhe më shumë se gjysmë ton drogë, sipas një deklarate nga qeveria e shtetit, e cila specifikon se viktimat i rezistuan aksionit të policisë.
Në operacionin, në të cilin morën pjesë mbi 2500 oficerë, humbën jetën katër oficerë policie, ndërkohë që aksioni vijon ende dhe numri i të vdekurve mund të rritet më tej.
Zona e prekur nga operacioni është shtëpia e afërsisht 280,000 njerëzve. Sipas autoriteteve bashkiake, 45 shkolla janë mbyllur, ndërsa të gjitha klinikat dhe qendrat shëndetësore kanë pezulluar operacionet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
