Një video e rreme me inteligjencë artificiale e cila qarkulloi në Indi shfaqte drejtorin ekzekutiv të Bursës së Bombeit, Sundararaman Ramamurthy, duke dhënë këshilla se cilat aksione duhet të blinin, duke premtuar fitime të mëdha.
Ishte në domenin publik ku shumë njerëz mund ta shihnin dhe të mashtroheshin duke blerë ose shitur aksione, sikur t’ua kisha rekomanduar unë. Nuk e dimë sa njerëz e kanë parë këtë video, kështu që nuk mund të gjykojmë nëse ka pasur një ndikim të madh apo jo.
Qëllimi, sipas tij, është i qartë: “Askush nuk duhet të pësojë humbje sepse beson diçka që është e pavërtetë.”
Fenomeni është në rritje të shpejtë. Sipas CEO-s së LastPass, Karim Toubba, “Gjatë dy viteve të fundit, kemi parë një rritje prej pothuajse 3000% në numrin e deepfakes që përdoren”.
Në vitin 2024, edhe ai vetë u shënjestrua kur një punonjës në Evropë mori një mesazh audio dhe tekst që pretendonte të ishte prej tij me kërkesë urgjente.
“Mesazhi ishte në WhatsApp, i cili për ne nuk është një kanal komunikimi i sanksionuar”, shpjegoi Toubba.
Fakti që erdhi përmes telefonit personal e bëri punonjësin dyshues dhe rasti u raportua pa shkaktuar dëm financiar.
Jo të gjithë patën të njëjtin fat. Firma britanike Arup u godit në 2024 nga një mashtrim shumë i sofistikuar.
Një punonjës në Hong Kong transferoi 25 milionë dollarë në pesë llogari bankare, pasi mori pjesë në një video-telefonatë ku drejtori financiar dhe stafi tjetër rezultuan të ishin deepfake.
Studiuesja e teknologjisë Stephanie Hare theksoi: “Nuk do të doje kurrë të filloje thjesht një video-telefonatë me dikë dhe të transferoje 25 milionë dollarë.”
Ajo shtoi: “Kompanitë po duhet të ndërmarrin hapa shtesë për të siguruar këto lloje komunikimesh. Kjo është bota e re dhe e guximshme në të cilën ndodhemi tani.”
Sipas Matt Lovell, CEO i CloudGuard, krijimi i materialeve të rreme me inteligjencë artificiale kërkon vetëm disa minuta për video dhe audio me cilësi shumë të lartë.
Kostoja për një sulm të thjeshtë nga një individ varion nga 500 deri në 1000 dollarë, ndërsa një sulm më i sofistikuar kushton 5000 deri në 10000 dollarë.
Ai paralajmëron: “Vektorët e sulmit po përshpejtohen më shpejt sesa mund të përshpejtojmë automatizimin dhe mbrojtjen”
Ndërkohë, kompanitë po përdorin teknologji verifikimi që analizojnë shprehjet e fytyrës, lëvizjet e kokës dhe madje edhe ndryshimet në rrjedhën e gjakut nën qepalla për të dalluar nëse një video është e gjeneruar nga AI apo reale.
Toubba e përshkruan situatën si “një garë” për të zhvilluar dhe bllokuar teknologjinë sa më shpejt. Hare thekson se ekziston mungesë globale e ekspertëve të sigurisë kibernetike dhe se drejtuesit e kompanive tani do të kalojnë më shumë kohë me ekipet e sigurisë, pasi rreziku i falsifikimeve që përfshijnë CEO dhe drejtues financiarë është bërë real dhe i kushtueshëm në miliona dollarë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
