Vullkani Sakurajima, një nga vullkanet më aktivë të Japonisë, ka shpërthyer disa herë në ishullin Kyushu, duke nxjerrë në atmosferë sasi të mëdha hiri dhe mbetjesh vullkanike.
Sipas autoriteteve japoneze, gjatë aktivitetit të fundit u regjistruan tre shpërthime të forta, të cilat krijuan re hiri që u ngritën mbi 2.000 metra mbi krater. Njëri prej shpërthimeve ishte edhe më i fuqishëm, duke e çuar kolonën e hirit deri në rreth 3.000 metra lartësi.
Agjencia Meteorologjike e Japonisë vijon të monitorojë nga afër aktivitetin e vullkanit, ndërsa banorëve në zonat përreth u është bërë thirrje të tregojnë kujdes për shkak të rënies së hirit dhe materialeve vullkanike.
Fatmirësisht, deri më tani nuk raportohet për të lënduar apo dëme të mëdha strukturore, megjithëse hiri ka mbuluar disa zona përreth.
Sakurajima, i vendosur në prefekturën Kagoshima, është një nga vullkanet më aktivë në botë dhe shpërthimet e tij janë të shpeshta, ndaj autoritetet mbajnë në fuqi monitorim të vazhdueshëm për të garantuar sigurinë e popullsisë dhe të trafikut ajror.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
